Öryggiskerfið Eyesight í Subaru hlaut fyrstu verðlaun í flokknum „Connectivity“ í alþjóðlegu samkeppninni Automotive Brand Contest í Þýskalandi sem lauk í liðinni viku. Verðlaunin verða afhent á alþjóðlegu bílasýningunni í Frankfurt 15. september nætkomandi.
Automotive Brand Contest er hlutlaus alþjóðleg keppni þar sem bílaframleiðendur keppa í hönnun og nýjungum. Í úrslitum eru síðan framúrskarandi vörur heiðraðar og hefur samkeppnin öðlast mikla virðingu í alþjóðlegu bílgreininni, þar sem vakin er athygli á nýjungum sem brjóta blað að mati dómnefndar.
Ein verðlaunin enn
Volker Dannath, framkvæmdastjóri Subaru í Þýskalandi sagði af þessu tilefni að hið nýja og byltingarkennda öryggiskerfi Subaru, Eyesight, hefði þegar sannað gildi sitt sem mikilvæg forvörn gegn slysum og til að draga úr tjónum í þeim tilvikum sem ekki tekst að komast hjá ákeyrslum.
„Frá því að Eyesight var kynnt til sögunnar hefur öryggiskerfið unnið til hverra verðlaunanna á fætur öðrum og verðlaunin sem kerfið hlaut að þessu sinni eru kærkomin viðbót á sigurgöngu þess um allan heim. Það er sérstaklega ánægjulegt að Eyesight hafi hlotið verðlaun í þessum flokki,“ sagði Dannath Þegar tilkynnt var um úrslitin.
Í þróun í 20 ár
Í þessu tilviki mætti ef til vill útleggja Connectivity sem „samhæfð tengsl“ á íslensku þar sem öryggiskerfið tengir saman tvær myndavélar sem staðsettar eru innan við framrúðuna og senda litmyndir í þrívídd til tölvu sem kennt hefur verið að bera kennsl á lögun hluta og greina hraða og fjarlægðir með næstum sömu nákvæmni og mannsaugað býr yfir. EyeSight gerir einnig greinarmun á gangandi vegfarendum, reiðhjólum, mótorhjólum og bílum auk þess að skynja hemlaljós svo eitthvað sé nefnt.
EyeSight er eitt fullkomnasta öryggiskerfi sem völ er á í dag og aðstoðar ökumenn við að koma í veg fyrir árekstra. Subaru hefur unnið að þróun kerfisins síðastliðin 20 ár og hafði verið í prófunum í almennri umferð í Japan í fimm ár áður en það var sett á alþjóðamarkað síðastliðið vor.
Eyesight frá Subaru fær ein verðlaunin enn
