Tæplega 200 þúsund ferðamenn komu til Íslands í ágúst

Um 189 þúsund erlendir ferðamenn fóru frá landinu í síðasta mánuði. Sú tala er 36 þúsundum hærri en í sama mánuði í fyrra og einnig mesti fjöldi ferðafólks sem hefur farið frá landinu í einum mánuði frá upphafi. Þetta kemur fram í samantekt Ferðamálastofu.

Það sem af er ári hefur verið aukning á straumi ferðamanna í hverjum einasta mánuði samanborið við árið í fyrra. Mest var aukningin í maí, 36,4%, og í janúar og febrúar er hún nam 34,5%.

Tæplega einn af hverjum fimm ferðamönnum sem heimsótti landið var frá Bandaríkjunum. Þjóðverjar fylgdu næstir með einn af hverjum átta. Frakkar, Bretar, Ítalir, Spánverjar, Kínverjar, Kanadamenn, Danir og Svíar eru í næstu sætum. Saman mynda þessar þjóðir rúmlega 70% ferðalanga á Íslandi í ágúst. Nokkrum þjóðum fækkaði hins vegar og má þar helst benda á Norðmenn, 12,2% fækkun, og Rússland með 51,3% fækkun.

Það sem af er ári hafa rúmlega 887 þúsund ferðamenn farið frá landinu en á sama tíma í fyrra stóðum við í 700 þúsund ferðamönnum. Helmingi fleiri Bandaríkjamenn hafa sótt landið heim í ár en í fyrra.