Svanasöngur Jenson Button í Formúlu 1

Jenson Button sem ekur fyrir McLaren í Formúlu 1 er einn af eldri ökumönnum þar og hefur ekki náð miklum árangri undanfarið þrátt fyrir að hafa hampað titlinum á árum áður.

Í japanska kappakstrinum um næstu helgi er búist við því að hann greini frá brotthvarfi sínu úr Formúlu 1 og að það vilji hann gera sjálfur frekar en að honum verði gert að hætta og rýma fyrir sér yngri manni.

Fyrir síðasta keppnistímabil varð hann fyrir valinu sem ökumaður McLaren liðsins en margir áttu von á því að Kevin Magnussen yrði ofaná, en McLaren vildi leita stöðugleika með reyndum ökumanni, en nú virðist það fullreynt.

Með fyrirsjánalegu brotthvarfi Button kemur sú spurning hvað hann muni taka sér fyrir hendur. Heyrst hefur að hann hafi hug á því að keppa í Le Mans þolaksturskeppninni og samhæfa það vinnu við sjónvarp í þolaksturskeppnum. Hann hefur verið tengdur við Porsche sem ökumaður þar og færi þar í fótspor annarra reyndra Formúlu 1 ökumanna svo sem Mark Webber og Nico Hulkenberg.

Einnig hefur heyrst að Button hyggi á feril í rallýkrossi eða Super GT series fyrir Honda. Enn ein tillagan lýtur að starfi við nýja Top Gear þætti við hlið Chris Evans. Líklegasti eftirmaður Button hjá McLaren er enn Daninn Kevin Magnussen en einnig hefur nafn Belgans Stoffel Vandoorne heyrst, en hann er einn af prufuökumönnum McLaren í dag og sigursæll maður í óþekktari aksturskeppnum.