Red Bull fær lokafrest til að finna vél

Eigandi Red Bull, Deitrich Mateschitz hefur gefið út að liðið ákveði í október hvort það yfirgef Formúlu 1.

Fyrrum heimsmeistararnir og systurlið þeirra, Toro Rosso hafa hótað að yfirgefa Formúlu 1. Framtíð þeirra í íþróttinni veltur á því hvort takist að finna vélaframleiðanda sem getur skaffað liðinu samkeppnishæfar vélar á næsta ári.

Red Bull hefur sagt skilið við Renault sem hefur séð liðinu fyrir vélum undanfarin ár. Ástæða samningsslitanna er sú að Red Bull er orðið þreytt á aflskorti Renault vélarinnar.

Mercedes hefur þegar formlega hafnað beiðni Red Bull um vélar. Mercedes vill frekar einbeita sér a eigin árangri.

Honda mun einungis sjá McLaren fyrir vélum á næsta ári. Það verður ekki litið framhjá því að Honda hefur átt enn erfiðara en Renault.

Ferrari virðist því eina von Red Bull og Toro Rosso. Nú er svo komið að Sebastian Vettel er að klára sitt fyrsta tímabil með Ferrari. Hann ók þar áður fyrir Red Bull, hann vann átta heimsmeistaratitla með liðinu, fjóra titla bílasmiða og fjóra sjálfur.

Vettel veit því vel hvað Red Bull getur með góðri vél. Það er því ansi líklegt að hann vilji hafa eitthvað með það að segja hvort núverandi lið hans skaffi gamla liðinu vélar. Ætli hann gruni ekki að Red Bull stingi Ferrari þá af.

Aðspurður hversu lengi hann væri reiðubúinn að bíða eftir samningi svaraði Mateschitz: „Þangað til seint í október.“