RÚV uppfyllti skilyrði vegna viðbótarframlags

Það er afstaða fjármálaráðuneytisins að RÚV hafi af sinni hálfu uppfyllt skilyrði vegna viðbótarframlags á fjárlögum síðasta árs. Þetta segir í svari ráðuneytisins við fyrirspurn RÚV.

Formaður og varaformaður fjárlaganefndar Alþingis hafa bæði sagt að forystumenn RÚV hafi sýnt fjárlaganefnd rangar upplýsingar um stöðu félagsins en RÚV var heitið viðbótarframlagi að ákveðnum skilyrðum í rekstri uppfylltum.

„Það er afstaða ráðuneytisins að RÚV hafi af sinni hálfu uppfyllt skilyrði sem nefnd voru í nefndaráliti með fjárlagafrumvarpi,“ segir meðal annars í svari fjármálaráðuneytisins sem finna má í heild sinni hér fyrir neðan. „Fjármála- og efnahagsráðuneytið taldi því ekki ástæðu til að leggja til í frumvarpi til fjáraukalaga, sem liggur fyrir Alþingi, að fjárheimildir verði lækkaðar á yfirstandandi fjárlagaári.“