Bankaskatturinn á að skila sex milljörðum í ríkis­sjóð

Í skoðanagrein á Vísi sem Þórður Snær Júlíusson, framkvæmdastjóri þingflokks Samfylkingarinnar, skrifar á Vísi fer hann yfir nýja fjármálaáætlun sem Daði Már Kristófersson, fjármála- og efnahagsráðherra kynnti í vikunni.

„Þar er líka boðað að skattur á banka verði loksins hækkaður á ný. Það á að skila ríkissjóði um sex milljörðum króna í nýjar tekjur á næsta ári til að standa undir samneyslunni,“ skrifar Þórður Snær.

Hvergi í kynningu Daða Más né gögnum sem fylgja fjármálaáætlun kemur fram hversu mikilla tekna viðbótarskatttekjurnar eiga að afla. Þá kemur ekki fram hvernig standi til að afla þessara viðbótarskatttekna.

Heiðrún Jónsdóttir, framkvæmdastjóri Samtaka fyrirtækja í fjármálaþjónustu, sagði í viðtali á Vísi í gær að ákvörðunin kæmi á óvart og að algjör óvissa ríki um hvers konar viðbótarskatta væri að ræða. 

Hún sagðist ekki hafa fengið nein svör um hvernig Daði Már ætlaði sér að útfæra viðbótarskattheimtuna né hversu miklar skatttekjur hann ætli sér að sækja í ríkiskassann.