Nico Rosberg náði fimmta ráspólnum í röð

Nico Rosberg á Mercedes verður á ráspól í brasilíska kappakstrinum á morgun. Liðsfélagi hans, Lewis Hamilton varð annar í tímatökunni og Sebastian Vettel á Ferari varð þriðji.

Fernando Alonso fékk skilaboðin „Stoppaðu strax, stoppaðu strax,“ í fyrstu lotu tímatökunnar. McLaren bíllinn var ekki í sínu besta formi um helgina.

Alonso tillti sér á tjaldstól við hlið brautarinnar og horfði á tímatökuna þaðan.

Valtteri Bottas á Williams fór inn í tímatökuna vitandi að hann fengi þriggja sæta víti eftir hana. Hann tók fram úr Felipe Nasr undir rauðum flöggum á æfingu í gær. Daniel Ricciardo fær líka víti, Red Bull bíllinn þurfti enn eina vélina.

Í fyrstu lotu duttu Manor ökumennir út ásamt McLaren mönnum og Pastor Maldonado á Lotus.

Sebastian Vettel tróð sér inn á milli Mercedes mannanna í sinni atlögu í annarri lotu.

Romain Grosjean snéri Lotus bílnum undir lok lotunnar, hann var heppinn að sleppa við varnarvegg. Grosjean gat haldið áfram en endaði samt 15 og komst ekki áfram í þriðju lotu.

Mercedes og Ferrari gáfu sínum ökumönnum bara eitt tækifæri en það dugði og dekkin sem þeir byrja keppnina með undir á morgun því í fínu formi.

Sauber ökumennirnir duttu út í annarri lotu ásamt Carlos Sainz á Toro Rosso, Sergio Perez á Force India og Grosjean á á Lotus.

Baráttan um ráspól í þriðju lotu byrjaði á því að Rosberg setti besta tíma helgarinnar í fyrstu tilraun. Hamilton var tæpum tíunda úr sekúndu á eftir.

Hamilton komst ekki hraðar en Rosberg sem bætti bara í á síðasta hringnum.

Bein útsending frá keppninni hefst klukkan 15:30 á morgun á Stöð 2 Sport.

Hér fyrir neðan má sjá öll úrslit helgarinnar sem uppfærast eftir því sem á líður.