Mercedes átti föstudaginn í Brasilíu

Lewis Hamilton var fljótastur á fyrri æfingu dagsins. Liðsfélagi hans hjá Mercedes, Nico Rosberg var fljótastur á seinni æfingunni. Ferrari menn eru næstir í röðinni.

Hamilton var lang fljótastur á fyrri æfingunni. Hann var rúmlega hálfri sekúndu á undan liðsfélaga sínum. Sebastian Vettel á Ferrari varð þriðji og Daniel Ricciardo varð fjórði á Red Bull.

Hamilton hefur ekki látið árekstur sem hann lenti í, í vikunni hafa áhrif á sig. Hann klessti Pagani Zonda bíl sinn í Mónakó.

18 hröðustu ökumenn æfingarinnar voru allir á sömu 2,2 sekúndunum. Kimi Raikkonen var fimmti á Ferrari og fyrsti maðurinn sem var yfir sekúndu á eftir Hamilton. Það er því þéttur pakki á eftir Mercedes, tímatakan verður væntanlega afar spennandi.

Rosberg var fljótastur á seinni æfingunni, Hamilton varð annar, tæplega hálfri sekúndu á eftir Rosberg. Vettel var eini sem náði að vera innan við sekúndu á eftir Rosberg að Hamilton frátöldum.

Baráttan fyrir aftan Mercedes var áfram þétt og 1,8 sekúndur skildu að Vettel í þriðja sæti og Fernando Alonso á McLaren í 18 sæti.

Alonso þurfti reyndar að hætta þátttöku á seinni æfingunni, Honda vélin virtist gefa sig í McLaren bílnum.

Bein útsending frá tímatökunni í Brasilíu hefst klukkan 15:50 á Stöð 2 Sport 3. Keppnin er svo í beinni útsendingu á Stöð 2 Sport, útsendingin hefst klukkan 15:30 á sunnudag.

Hér fyrir neðan má sjá gagnvirkt brautarkort með öllum úrslitum helgarinnar.