Sjö manna Honda CR-V

Sést hefur til lengri gerðar Honda CR-V sem fyrirtækið er greinilega með í prófunum. Það bendir til þess að á leiðinni sé þriggja sætaraða Honda CR-V. Slíkur bíll gæti orðið í boði með tilkomu næstu kynslóðar Honda CR-V.

Eins og á myndinni sést er hér kominn ansi langur CR-V bíll og á henni má greina að afturhurðin er talsvert stærri en í núverandi bíl og það eitt bendir til þess að hann verði með þrjár sætaraðir. Næsta kynslóð Honda CR-V er væntanleg árið 2017, svo ef til vill er ekki langt að bíða þessa bíls.

Raddir hafa heyrst um að þessi lengri gerð verði í boði á flestum mörkuðum, en þó ekki í Bandaríkjunum. Svo virðist sem 7 manna jepplingar og jeppar séu alfarið að leysa af hólmi MPV (Multi Purpose Vehicles) bíla, eða strumpastrætóa og virðast kaupendur fráhverfir þeim bílum um þessar mundir. Framleiðslu margra slíkra bíla hefur verið hætt á síðustu misserum þar sem sala þeirra hefur minnkað svo mikið.

Ástæðan fyrir því að Honda hyggst ekki bjóða lengdan CR-V í Bandaríkjunum er sú að þar býður Honda Pilot og Odyssey bílana sem báðir eru stærri en CR-V og því vill Honda ekki að lengdur CR-V keppi við hann í Bandaríkjunum. Honda Pilot og Odyssey bílar er óvíða í boði utan Bandaríkjanna.