Magnað að sjá hvernig Ólafía stóðst álagið

Ólafía Þórunn Kristinsdóttir, kylfingur úr GR, varð í gær önnur íslenska konan á eftir Önnu Maríu Jónsdóttur til að tryggja sér þátttökurétt á Evrópumótaröð kvenna í golfi. Ólafía spilaði lokahringinn á lokaúrtökumótinu í Marokkó á fjórum höggum undir pari og varð í 25.-27. sæti en 30 efstu kylfingarnir komust áfram.

„Þetta er gríðarlega stór áfangi fyrir Ólafíu og íslenskt golf. Það er frábært að koma kylfingi á efsta stig atvinnumennskunnar,“ segir Úlfar Jónsson, landsliðsþjálfari Íslands í golfi, við Fréttablaðið.

Árangur Ólafíu á árinu er magnaður en hún spilaði vel í næstefstu deild Evrópugolfsins og kláraði svo sitt fyrsta ár sem atvinnumaður með því að komast inn á Evrópumótaröðina sem er hæsta stigið í Evrópu.

„Árangurinn í 2. deildinni sýndi að hún á fullt erindi í efstu deildina. Það voru þó nokkuð mörg mót í ár þar sem hún var á meðal tíu og fimmtán efstu. Það er góður mælikvarði á að þú hefur það sem þarf til að spila í efstu deildinni,“ segir Úlfar en Skagakonan Valdís Þóra Jónsdóttir var einnig á lokaúrtökumótinu.

Erfitt að komast inn

„Hún stóð sig líka frábærlega í 2. deildinni í ár og bætti sig mikið á milli ára. Henni fataðist flugið aðeins á fjórða degi úrtökumótsins en hún hefur líka sýnt að hún á fullt erindi þarna inn. Það er frábært að vera komin með eina þarna inn og aðra sem bankar á dyrnar.“

Nokkur hundruð kylfingar hefja leik á úrtökumótunum og er baráttan um sætin 30 virkilega hörð. Ólafía spilaði hreint frábært golf á lokadeginum og sýndi mikil gæði. Til að gulltryggja sæti sitt fékk hún fugl á lokaholunni.

„Þetta er gríðarleg hvatning fyrir Ólafíu fyrst og fremst. Hún sýndi að hún getur þetta. Það er svo mikil pressa og sía að reyna að komast þarna í gegn. Það er magnað að halda þetta út því það krefst mikils úthalds bæði andlega og líkamlega. Það var gaman að sjá að hún var með fulla stjórn á hlutunum,“ segir Úlfar.

Kostnaðurinn mikill

Ólafía mun keppa út um allan heim á næsta ári en það mun kosta sitt. Þó hún sé komin inn á Evrópumótaröðina þarf hún sjálf að standa straum af kostnaði við þátttöku á mótum.

„Því miður er þetta ekki eins og í fótboltanum þar sem þú ert bara á samningi. Það er heldur ekkert í hendi með verðlaunafé. Það þarf að ná árangri til að afla tekna á mótaröðinni,“ segir Úlfar.

Tekjurnar fyrir efstu konur á mótunum eru fínar en á Evrópumótaröð kvenna er barist um töluvert lægri fjárhæðir en hjá körlunum. Fyrsta mótið verður á Nýja-Sjálandi um miðjan febrúar þar sem kylfingarnir skipta á milli sín 200.000 evrum. Fyrsta mótið í Evrópumótaröð karla fór fram í nóvember og þar var heildarverðlaunafé ein og hálf milljón evra.

„Ólafía hefur fengið góðan styrk frá Forskoti, afrekssjóði kylfinga, sem gerir henni kleift að standa í þessu. Svo fær hún góðan stuðning frá golfsambandinu, sínum heimaklúbbi og fjölskyldunni. Það þurfa margir að hjálpast að,“ segir Úlfar Jónsson.