Tíu spennandi plötur ársins 2015

Freyr Bjarnason skrifar 2. janúar 2015 12:00

1. Kanye West

Reiknað er með að sjöunda hljóðversplata bandaríska rapparans komi út í síðasta lagi næsta sumar. Upptökustjórar eru Rick Rubin og Q-Tip, fyrrverandi meðlimur A Tribe Called Quest, sem hefur áður starfað með West. Síðasta plata rapparans, hin margslungna Yeezus, kom út 2013.

2. Radiohead

Enska hljómsveitin hóf vinnu við sína níundu hljóðversplötu seint á þessu ári og búist er við útgáfu einhvern tímann árið 2015. Upptökustjóri er sem fyrr Nigel Godrich, en Radiohead sendi síðast frá sér hina taktvissu King of Limbs árið 2011.

3. Metallica

Bandarísku þungarokkararnir hafa verið önnum kafnir í hljóðveri að undanförnu við gerð sinnar tíundu hljóðversplötu. Gítarleikarinn Kirk Hammett sagði við MTV að hljómsveitin væri að safna í gítarriff-bankann sinn og það hefði gengið vel. Síðasta plata Metallica, Death Magnetic, kom út 2008.

4. Madonna

Poppdrottningin hefur unnið hörðum höndum að sinni þrettándu hljóðversplötu, Rebel Heart. Þrettán ókláruðum lögum af plötunni var lekið á netið fyrr í þessum mánuði og í framhaldinu voru sex lög gefin út opinberlega. Útgáfa er fyrirhuguð í mars og á meðal laga eru Ghosttown og Living For Love, sem þykja vel heppnuð.

5. Adele

Allur heimurinn hefur beðið óþreyjufullur eftir nýju efni frá ensku söngkonunni Adele síðan platan 21 kom út árið 2011. Margir eru vongóðir um að ný plata líti dagsins ljós í ár. Adele hefur verið að vinna í plötunni undanfarið og samstarfsmaður hennar, Ryan Tedder, vill meina að hún verði „klikkuð“. Líklegur titill er 25.

6. The Libertines

Bresku rokkararnir gerðu útgáfusamning við Virgin EMI og hyggja á útgáfu sinnar fyrstu plötu í áratug. Carl Barat og Pete Doherty hafa samið lög á plötuna bæði í Þýskalandi og Taílandi þar sem sá síðarnefndi hefur verið í meðferð.

7. Muse

Muse hefur lofað því að næsta plata og sú sjöunda í röðinni verði ekki eins tilraunakennd og sú síðasta. Söngvarinn Matt Bellamy segir að platan verði hrárri og rokkaðari þar sem þriðja heimsstyrjöldin verði á meðal þess sem sungið verði um. Útgáfan er fyrirhuguð í sumar.

8. Coldplay

Sjöunda hljóðversplata ensku hljómsveitarinnar gæti orðið sú síðasta, ef eitthvað er að marka orð forsprakkans Chris Martin. Búast má við hressari plötu en Ghost Stories sem leit dagsins ljós í fyrra. Titillinn verður A Head Full of Dreams.

9. Rihanna

Söngkonan vinsæla hefur strítt aðdáendum sínum með stuttum hljóðbrotum á Instagram-síðu sinni að undanförnu en beðið hefur verið eftir nýju efni frá henni með óþreyju. Búast má við áttundu plötu Rihönnu árið 2015 en sú síðasta, Unapologetic, kom út 2012.

10. Red Hot Chili Peppers

Söngvarinn Anthony Kiedes tilkynnti að hljómsveitin væri á leiðinni í hljóðver í desember til að taka upp sína elleftu hljóðversplötu. Tók hann fram að Josh Klinghoffer myndi láta ljós sitt skína bæði sem gítarleikari og lagahöfundur. Síðasta plata fönkrokkaranna, I"m With You, kom út 2011.

Tónlist

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins