Haltu jurtunum lengur á lífi

Ferskar kryddjurtir setja oft punktinn yfir i-ið í eldamennskunni, þær eru bæði bragðgóðar og fallegar sem skraut. Fyrir örfáum árum var varla að finna ferska kryddjurt í matvöruverslunum landsins en nú er boðið upp á þær daglega í flestum verslunum og þykir okkur á Lífinu það vera fagnaðarefni.

Eini óskosturinn við að kaupa heila öskju af afskornum og ferskum kryddjurtum er að þær, sem og annað grænmeti og salat, verða slappar ansi fljótt.

Við lumum aftur á móti á nokkrum ráðum fyrir þig sem lengja líftíma jurtanna.

- Settu afskornar kryddjurtir í vatnsglas og tylltu glærum plastpoka yfir svo að lofti um jurtirnar, geymdu jurtirnar í ísskáp. Með því að setja plastpokann yfir þá myndast raki og mætti segja að með þessu þá sértu búinn að búa til lítið gróðurhús.

- Rúllaðu afskornum kryddjurtum í eldhúspappír og pakkaðu þeim svo inn í glæran plastpoka. Þannig heldurðu jurtunum þurrum og ferskum lengur.

- Saxaðu kryddjurtirnar niður og settu í ísmolabox. Fylltu það svo upp með vatni eða ólífuolíu eftir því í hvað þú ætlar að nota þær síðar meir. Ekki nota til dæmis ólífuolíu ef þú ætlar að nota ferska mintu í mojítóinn, þá er nú betra að nota vatnið eða jafnvel hrásykursblandað vatn. Frystu molana og notaðu þá þegar þér hentar.