Tónaljóð um þjáningu

?Passían hans Hafliða er, frá mínum bæjardyrum séð, meðal merkustu verka af þessu tagi sem íslensk tónskáld hafa skrifað,? segir Hörður Áskelsson, organisti í Hallgrímskirkju, um óratóríuna Passíu op. 28 eftir Hafliða Hallgrímsson. Hún verður flutt í kirkjunni á Skólavörðuholtinu á morgun klukkan 17.

Passía var samin í tilefni kristnitökuafmælisins árið 2000 fyrir Hörð og hans kór. „?Hún er okkur dýrmætur hlutur, eitt þeirra verka sem ég er hvað stoltastur af að eiga hlutdeild að,“? segir hann.

Frá því passían var frumflutt í febrúar 2001 og hljóðrituð ári síðar, hefur hún aldrei verið flutt opinberlega, að sögn Harðar. Hann furðar sig á því þar sem henni var hrósað mjög í erlendum tónlistartímaritum eftir útgáfu hennar á geisladiski árið 2003.

„?Ég tel að verkið eigi erindi út fyrir skerið okkar því tónlistin er mjög mögnuð, þó ekki sé hún auðveld. Tónmálið er ágengt enda fjallar það um píslir og orðið passía er leiðarstef gegnum allt verkið.?“

Hörður segir val Hafliða á stefbrotum úr íslenskum ljóðum eftir Hannes Pétursson, Stein Steinar, Matthías Johannessen og Baldur Óskarsson sterkt og seinni parturinn sé úr Passíusálmum Hallgríms, síðustu orð Krists, sunginn af tenór.

„?Það er svolítið leikræn útfærsla, samt ekki óratóría sem segir beinlínis söguna heldur meira tónaljóð um þjáninguna,“? lýsir Hörður. „?Engin skemmtitónlist en mjög grípandi og lætur engan sæmilega lifandi ósnortinn.“?