Besta byrjun Breiðabliks frá meistaraárinu

Breiðablik hefur farið liða best af stað í Pepsi-deild kvenna. Blikastúlkur unnu gríðarlega mikilvægan 1-0 sigur á Selfossi í Pepsi-deildinni í fyrradag en með honum náðu þær fjögurra stiga forskoti á toppi deildarinnar.

Blikar eru búnir að vinna sér inn 19 stig, fjórum meira en Stjarnan og Selfoss sem eru í 2. og 3. sæti. Blikastúlkur eru búnar að vinna sex af fyrstu sjö leikjum sínum og gera eitt jafntefli. Markatalan er líka frábær; 23 mörk skoruð og aðeins tvö fengin á sig.

Breiðabliki var spáð sigri í Pepsi-deildinni í ár og byrjunin lofar allavega góðu. Sérstaklega í ljósi þess að Blikar hafa ekki byrjað jafn vel í efstu deild síðan 2005 – árið sem félagið varð síðast Íslandsmeistari.

Þá unnu Blikar fyrstu sjö leiki sína með markatölunni 28-5 og voru með 21 stig á toppi deildarinnar, þremur stigum á undan Val. Þegar upp var staðið fékk Breiðablik 40 stig í 14 leikjum árið 2005; vann 13 leiki og gerði eitt jafntefli. Blikar eru þegar búnir að tapa jafn mörgum stigum í ár og allt tímabilið 2005 en miðað við spilamennsku liðsins í sumar er ólíklegt að það tapi mörgum stigum til viðbótar.

Aðeins einn leikmaður er eftir í Breiðabliksliðinu frá Íslandsmeistaraárinu 2005. Það er landsliðskonan Fanndís Friðriksdóttir sem kom fyrst inn í lið Breiðabliks sumarið 2005, aðeins 15 ára gömul. Fanndís, sem er markahæst í Pepsi-deildinni í ár, lék þrjá leiki í efstu deild sumarið 2005 og skoraði eitt mark.