Hafa legið í dvala í fimmtán ár

„Þetta er sextán ára gamalt band sem hefur samt legið í dvala í fimmtán ár. Við erum búnir að taka tvö gigg á þessum sextán árum,“ segir Róbert Örn Hjálmtýsson, einn af meðlimum hljómsveitarinnar Spilagaldra. Hann skipar sveitina ásamt Sverri Þór Sverrissyni, sem er líklega best þekktur sem Sveppi, og Steindóri Inga Snorrasyni.

Sveppi hefur í gegnum tíðina sýnt það og sannað að hann kann að syngja. „Mér líður ekki eins og frontmanni í bandi en það á eftir að koma reynsla á það þegar á líður. Mér finnst gaman að syngja og það er sérstaklega gaman að syngja sín eigin lög með sínum bestu vinum,“ segir Sveppi spurður um sönginn.

Spilagaldrar sendi á dögunum frá sér sitt þriðja smáskífulag en lagið ber nafnið Sveitasæla. „Steindór samdi þetta lag og það varð til í fyrstu tilraun, það var bara ýtt á „rec“ og þá varð lagið til. Sveppi samdi næstum því allan textann samtímis þegar ýtt var á rec. Þetta var rosalegt. Við editeruðum svo aðeins textann mörgum árum síðar þegar lagið var tekið upp aftur í stúdíói. En það voru ekki gerðar margar breytingar,“ segir Róbert Örn spurður út í lagið.

Þeir félagar vinna hörðum höndum að því að klára sína fyrstu breiðskífu og reyna eftir fremsta megni að komast í sama gír og þeir voru í fyrir sextán árum. „Ég vil bara búa til músík og vinna á bensínstöð eins og í þá daga. Ég er í sama fíling og fyrir sextán árum og er meira að segja að vinna sem afleysingakanslari á sömu bensínstöð og ég vann á á þessum tíma,“ segir Róbert Örn og hlær. Hann vill þó ekki gefa upp hvenær fyrsta platan kemur út en lofar hins vegar frábærri plötu þegar hún kemur loksins út. 

Nýja myndbandið má sjá hér að neðan.