Fara óhefðbundna leið í fjáröfluninni

Álfrún Gísladóttir er um þessar mundir að sýna á Edinborgarhátíðinni ásamt leikhópi sínum. Verkið heitir The Lost Art of Lost Art og hefur fengið einróma lof gagnrýnenda og meðal annars fjórar stjörnur í Broadway Baby sem er virt blað. Hópurinn fer óvenjulegar leiðir í að fjármagna sýninguna. Auk Álfrúnar kemur Sara Blöndal að verkinu, en hún hannar búninga og leikmynd.

„Við erum búin að vera að sýna á hverjum degi frá því í byrjun ágúst. Seinasta sýningin verður 30. ágúst en við fáum frí 19. ágúst. Sýningin fjallar um listaverkaþjófa sem stela Ópinu eftir Munch og eru í sífellu að biðja um meiri pening fyrir það. Sýningin er mjög fyndin og skemmtileg en áhorfendur hlæja mikið.“

Álfrún tók þátt í keppni á vegum Scottish Daily Mail og Drama UK og sigraði í flokknum „new acting talents“ og fékk 6.000 pund í verðlaun. Þann pening ætlar hún að nota til að borga upp kostnaðinn af sýningunni en hún kostar í kringum 10.000 pund. Til þess að borga restina hefur hópurinn byrjað með heldur frumlega fjáröflunarleið.

„Við settum svo upp okkar eigin vefsíðu í stað þess að borga 8% af ágóðanum okkar til Kickstarter. Þegar fólk styrkir okkur um 20 pund þá fær það sent persónulegt og skemmtilegt þakkarvídeó. Þegar við fáum styrk upp á 50 pund eða meira þá fær fólk að velja sér lag sem við syngjum. Við höfum líka lofað að skrifa bréf og fleira.“ Hópurinn hefur nú safnað 1.400 pundum sem getur ekki talist annað en mjög gott.