Belgísk sjónvarpsstöð vænir Opel um dísilvélasvindl

Belgíska sjónvarpsstöðin VRT vænir Opel um að hafa útbúið Opel Zafira bíla sína með svindlhugbúnaði sem villir fyrir um raunverulega mengun bílanna. Í mælingum í venjulegum akstri kom í ljós að Zafira bílarnir menguðu 9 sinnum meira en gefið er upp hjá Opel.

Í kjölfar mælinganna segir sjónvarpsstöðin að Opel hafi innkallað ríflega 300 bíla og breytt hugbúnaði þeirra og eftir hana hafi mengunin reynst 2,5 til 2,8 sinnum meiri en uppgefnar tölur segja til um, en samt talsvert fyrir ofan mengunarreglur Evrópusambandsins.

VRT segist hafa sett leynilegar myndavélar og upptökubúnað undir einn þessara bíla og á þeim megi greina samtöl bifvélavirkja sem ræða um að þeir hafi trú á því að breytingin hafi verið gerð eingöngu til að minnka mengun þeirra sem ljóst var af framleiðandanum að væri alltof mikil.

Samkvæmt Opel var hún gerð til að leiðrétta villur í hugbúnaði og varð til að ónauðsynlegt viðvörunarljós kom upp í mælaborði. Opel neitar alfarið svindli og segir reyndar að viðgerðin hafi ekkert með minnkandi mengun að gera.

Hver hefur rétt fyrir sér verður forvitnilegt að sjá og hvort að belgíska sjónvarpsstöðin sé eingöngu að vekja athygli á sér eða hafi eitthvað fyrir sér í þessum þrætum, það verður bara að koma í ljós.