Adam Scott vann sitt fyrsta mót í eitt og hálft ár

Ástralski kylfingurinn Adam Scott stóð uppi sem sigurvegari á Honda Classic-mótinu sem kláraðist á PGA National-vellinum á Flórída í gærkvöldi. Fyrir sigurinn fékk hann rétt tæpar 142 milljónir króna.

Scott lék lokahringinn á pari eftir að fá þrjá fugla og þrjá skolla, en í heildina spilaði hann hringina fjóra á níu högum undir pari. Hann lagði grunninn að sigrinum á öðrum og þriðja hring sem hann spilaði á níu undir.

Spánverjinn Sergio Garcia var í harðri baráttu við Scott um sigurinn, en Garcia spilaði lokahringinn á einu höggi yfir pari. Hann fór völlinna í heildina á 272 höggum eða átta höggum undir pari, höggi meira en Scott og þurfti því að sætta sig við annað sætið.

Bandaríkjamennirnir Blayne Barber og Justin Thomas komu svo næstir en báðir spiluðu þeir hringina fjóra á 275 höggum eða fimm höggum undir pari vallarins.

Scott hefur haft hægt um sig í golfheiminum síðan hann tók árið 2014 með trompi. Það ár vann hann sitt fyrsta og eina risamót, Masters-mótið, og komst í efsta sæti heimslistans.

Síðan þá hefur hann ekki unnið PGA-mót og var kominn niður í 16. sæti heimslistans. Á sama tíma og þessi 35 ára gamli kylfingur vann ekki neitt voru ungu strákarnir að slá í gegn.

Jordan Spieth (átta titlar), Rory McIlroy (sjö titlar) og Jason Day (fimm titlar) unnu samtals 20 mót á milli sigra Scotts, en enginn þeirra er orðinn þrítugur.

„Það er svo sannarlega léttir að vinna loksins mót aftur eftir eitt og hálft ár án sigurs. Það verður bara erfiðara og erfiðara að vinna mót nú til dags,“ sagði glaður Adam Scott eftir sigurinn.

Hér að ofan má sjá það helsta frá lokadeginum en hér að neðan má sjá geggjað högg Scotts úr sandgryfju 136 metra frá pinna.