Mercedes Benz GLC43 mun keppa við Audi SQ5

Fram að þessu hafa þeir kaupendur sem kjósa mjög öfluga jepplinga helst geta keypt Audi SQ5 og öflugri útgáfur Porsche Macan. Nú bætist einn slíkur í hópinn í formi Mercedes Benz GLC43.

Hann verður í boði með 3,0 lítra vél með tveimur forþjöppum sem skilar 362 hestöflum til allra hjólanna. Þessi bíll er fær um að komast á 100 km hraða á 4,8 sekúndum og í rafrænt takmarkaðan hámarkshraða uppá 250 km/klst.

Þessar framístöðutölur jafna getu Mercedes Benz C450 fólksbílsins. Við vélina er tengd 9 gíra sjálfskipting. Bíllinn aðgreinir sig að utan frá hefðbundinni gerð GLC jepplingsins með grimmari ásýnd í formi “bodykit” og með því klýfur hann loftið betur og þrýstir honum betur í malbikið. Auk þess kemur hann á 19 tommu felgum.

Meira er lagt í innréttingu hans og fá má bílinn með körfusætum. Þessi nýja gerð GLC verður sýnd í næstu viku á bílasýningunni í New York.