Ný mótorhjólaleiga

Nýtt leigufyrirtæki sem leigir út mótorhjól hefur verið stofnað og fékk það fyrstu hjólin sín afhent í gær. Fyrirtækið heitir Offroadtours.is og að því standa þrír eigendur, þeir Hafsteinn Níelsson, Helgi Bjarni Birgisson og Njáll Gunnlaugsson.

Tveir þeirra eru reynsluboltar úr þessum geira en Njáll stofnaði ferðafyrirtækið Biking Viking Motorcycle Tours og Hafsteinn Riding Iceland á sínum tíma. "Við erum mjög spenntir fyrir sumrinu" sagði Hafsteinn Níelsson í samtali við Visir.is í dag.

"Við vorum að fá í hendurnar tvö glæný Honda Africa Twin ferðahjól sem er það heitasta í heimi ferðahjóla í dag og vinnur hvert samanburðarprófið á fætur öðru. Auk þess verðum við með Honda NC750X, CRF 250L torfæruhjól og CB 1100 fyrir þá sem vilja taka stutta síðdegistúra á flottu hjóli," sagði Hafsteinn um hjólin sem boðið verður uppá.

Að sögn Hafsteins er hugmyndin að leigja hjólin að mestu þetta sumarið en bjóða uppá skipulagðar ferðir á næsta ári. Reynslan er sú að fólk er að skipulegga svona ferðir með árs fyrirvara og því töldum við sniðugt að fara strax af stað. Nýja fyrirtækið hefur þegar tekið við fyrstu bókunum á leigum og verið er að semja við ferðaskipuleggjendur erlendis um skipulagðar ferðir."