Umfjöllun og viðtöl: Valur - KR 1-1 | KR-ingar sóttu stig á Hlíðarenda | Sjáðu mörkin

Valur og KR gerðu 1-1 jafntefli í 2. umferð Pepsi-deildar kvenna í kvöld en leikurinn fór fram að Hlíðarenda.

Valsmenn voru betri í leiknum en fengu samt sem áður fyrsta markið á sig þegar Ásdís Karen Halldórsdóttir  slapp í gegn og setti boltann í netið.

Það var síðan markadrottningin Kristín Ýr Bjarnadóttir sem náði að jafna metin fyrir heimamenn rétt undir lok leiksins. Valur var miklu meira með boltann í leiknum í magnað að liðið hafi bara skorað eitt mark.

Af hverju gerðu liðin jafntefli

KR-ingar spiluðu mjög skipulagðan og flottan leik. Þær héldu stöðu og gáfu ekki mörg færi á sér. Valsmenn voru miklu meira með boltann en liðið reyndi mikið háar fyrirgjafir og Hrafnhildur Agnarsdóttir sá við þeim flestum í marki KR. Stundum þegar Valsmenn komust í góða stöðu var eins og þær ætluðu sér að spila sig inn í markið, í stað þess að taka mun fyrr á skarið og láta skotin ríða af.

KR-ingar fengu algjört dauðafæri undir blálok leiksins og í raun besta færi leiksins en Sandra Sigurðardóttir varði mjög vel í marki Vals. Jafntefli var kannski sanngjarnt eftir allt saman en Valsmenn verða að klára sóknir sínar mun betur, því liðið er að koma sér í frábæra vallarstöðu og Valur vill vera með boltann en það þarf að setja naglann í líkkistuna.

Þessir stóðu upp úr

Hrafnhildur Agnarsdóttir var stórgóð í marki KR og besti maður vallarins. Hún gerði fá mistök, sýndi alltaf mikla yfirvegun í öllum sínum aðgerðum og þá sérstaklega í úthlaupum. Hún var að takast á við ótal hornspyrnur Vals og fyrirgjafir.

Í liði Vals var Dóra María Lárusdóttir mjög öflug á miðjunni og eini leikmaðurinn sem róaði leik liðsins á miðjunni. Það sama má segja um Margréti Láru Viðarsdóttur sem var einnig spræk í leiknum en hefði átt að fara betur með færin.

Hvað gekk illa?

Spil Valsmanna á síðasta þriðjungi vallarins er ábótavant og eitthvað sem leikmenn og þjálfari liðsins þurfa að skoða. KR er með það ungt og óreynt lið að það verður að nýta dauðafærin, það er algjört lykilatriði á þessu tímabili.

Hvað gerist næst?

Valsmenn fara til Vestmannaeyja í næstu umferð og spilar liðið við ÍBV. Ef Valur ætlar sér að vera með í toppbaráttunni, eins og allir gerðu ráð fyrir, þá verður liðið að vinna í Eyjum. Svo einfalt er það. KR-ingar mæta FH-ingum og væri gríðarlega sterkt fyrir liðið að ná í þrjú stig þar.

Ólafur: Með ólíkindum að þessi leikur hafi farið 1-1

 „Ég er bara gríðarlega svekktur, þetta er einn af þessum leikjum sem bara ekkert gengur upp,“ segir Ólafur Tryggvi Brynjólfsson, þjálfari Vals, eftir leikinn í kvöld.

„Það var bara eitt lið á vellinum í nánast 90 mínútur og með hreinum ólíkindum að leikurinn hafi farið 1-1.“

Hann segir að það hafi bara vantað að klára sóknirnar hjá Val betur í kvöld.

„Ég er alveg viss um að bakverðirnir hjá KR séu alveg búnar á því eftir þennan leik, við fórum það oft bakvið þær. Það má samt ekki taka það af KR að þær börðust rosalega vel.“  Ólafur segir að þessi byrjun sé vissulega undir væntingum en núna verður liðið bara að svara því vel.

Hrafnhildur: Lengsti hálfleikur lífs míns„Ég er eiginlega bara skítfúl en svona fyrirfram hefði maður alveg tekið þessum úrslitum,“ segir Hrafnhildur Agnarsdóttir, markvörður KR, sem var frábær í kvöld.

„Síðari hálfleikurinn var lengsti hálfleikur lífs míns. Á köflum var þetta alveg smá stressandi en mikilvægast var að halda skipulagi allan tímann og það gerðum við nokkuð vel í kvöld.“

Hún segir að liðið hafi kannski verið smá óheppið undir lokin þegar KR fékk tækifæri til að stela stigunum þremur.

„Hún [Sandra Sigurðardóttir, markvörður Vals] er bara best í þessu og gerði þetta ótrúlega vel,“ segir Hrafnhildur um úthlaup Söndru sem stöðvaði sennilega besta færi leiksins sem KR fékk í uppbótartíma.

Edda: Fengum allt í einu róandi sprautu í rassgatið

„Ég er bara nokkuð sátt með stelpurnar, en smá ósátt með það hvað við féllum langt til baka í seinni hálfleiknum,“ segir Edda Garðarsdóttir, þjálfari KR, eftir leikinn.

„Það var síðan eins og við fáum einhverja róandi sprautu í rassgatið þegar þær skora og þá förum við allt í einu að spila boltanum vel á milli okkar og komast í færi.“

Edda segir að það sé samt sem áður ekki hægt að vera reið með þessi úrslit og sérstaklega á móti liði sem hún vill kalla landsliðið.

„Við náðum að laga ákveðin atriði frá síðasta leik og í kvöld fannst mér taugarnar hjá mínum stelpum mun betri og þær voru rólegri.“

Hún segir að Hrafnhildur í markinu hjá KR hafi verið mjög góð.

„Mér fannst Valsstelpurnar samt komast upp með það að vera allt og mikið utan í henni. Það var stundum eins og dómarinn hafi bara verið að horfa á Margréti Láru stilla sér upp í hornspyrnu í staðinn fyrir að fylgjast með atburðarrásinni inni í vítateig.“

Margrét Lára: Vantaði meiri greddu inni í teig

„Ég held að við höfum slegið met í því að fá horspyrnur og góð færi án þessa að skora ekki fleiri mörk en við gerðum,“ segir Margrét Lára Viðarsdóttir, fyrirliði Vals, eftir leikinn.

„Það bara skiptir engu máli í fótbolta hvað þú skýtur oft á markið, ef þú skorar ekki þá telur það ekkert. Auðvitað erum við svekktar en við höldum bara áfram og það er annar leikur á þriðjudaginn.“

Hún segir að það hafi vantað smá greddu inni í teig hjá liðinu.

„Smá meiri ákveðin og hafa kannski meiri trú á því sem við vorum að gera inni á vellinum. Við vorum að skapa fullt og spila fínan fótbolta á köflum og koma okkur í þær stöður sem við erum góðar í, en svo vantaði bara að reka endapunktinn á þetta allt saman.“