Gleðin við völd í Danslistarskóla JSB

Danslistarskóli JSB stendur fyrir stuttum og bráðskemmtilegum vornámskeiðum fyrir krakka á aldrinum þrigga til tólf ára. Þar geta krakkar og foreldrar þeirra fengið að kynnast dansinum og séð hvort þau langi að læra meira.Innritun fyrir skólaárið 2016-2017 er einnig hafin.

„Við höfum haldið þessi vornámskeið í fjöldamörg ár og þau hafa ávallt mælst mjög vel fyrir. Við hugsum þau sem kynningu fyrir krakka og foreldra sem vilja fá örlitla innsýn inn í heim jazzballetts­ins og um hvað nútímalistdans snýst,“ segir Bára Magnúsdóttir, eigandi Danslistarskóla JSB. Vornámskeiðin hefjast 24. maí, standa yfir í þrjár vikur en kennt er tvisvar í viku. „Það er tilvalið núna þegar skólunum er að ljúka að leyfa krökkunum að hreyfa sig og dansa,“ segir Bára.

Boðið er upp á jazzballett fyrir krakka á aldrinum 7-9 og 10-12 ára en dans- og leikjanámskeið fyrir 3-6 ára börn. „Börnin þurfa ekki að hafa lært neitt í dansi áður enda er þetta skemmtileg leið fyrir þau að vita hvort þau hafi gaman af jazzballett,“ segir Bára glaðlega. Hún segir dansinn afar skemmtilegan. „Í jazzballett er alltaf verið að segja einhverja sögu og í raun dregur það fram listamanninn í krökkunum.“

JSB er annars vegar með almennan danslistarskóla sem sérhæfir sig í jazzballett. Námið er vinsælt og fjölbreytt og við hæfi allra. Megináhersla er lögð á jazzdans (street jazz, lyrical jazz, musical jazz, contemporary jazz o.fl., alhliða líkamsþjálfun og danstækni). Hins vegar rekur JSB einnig sérstaka listdansbraut sem hefst með fornámi fyrir 7-9 ára börn en tíu ára gömul geta þau tekið inntökupróf inn á listdansbrautina. Á menntaskólaárum gildir námið í skólanum til 51 einingar.

„Við höfum nú opnað fyrir innritun fyrir skólaárið 2016 til 2017 og ég hvet fólk til að skrá börnin sín sem fyrst, bæði þau sem hafa verið í skólanum síðustu ár og þau sem vilja hefja nám í haust, því aðsóknin er iðulega mikil,“ segir Bára.

Nánari upplýsingar má fá í síma 5813730 og á jsb.is