Nýtt textamyndband frá OMAM: Hrímaður Ólafur Darri túlkar Winter Sounds

Hljómsveitin Of Monsters and Men hefur sent frá sér nýtt textamyndband og í þetta skiptið er það enginn annar en leikarinn Ólafur Darri sem túlkar lagið Winter Sound með miklum tilþrifum. Er leikarinn hrímaður í myndbandinu og jafnvel kuldalegri en þegar hann lék lögreglustjórann Andra í þáttunum Ófærð. 

Hljómsveitin hefur farið þessa skemmtilegu leið með lögin af nýjustu plötu sinni Beneath the Skin sem kom út í fyrra. Á meðal þeirra sem hafa túlkað lög þeirra í textamyndböndum eru Sigurður Sigurjónsson, Ingvar E. Sigurðsson, Natalie G. Gunnarsdóttir, tvíburarnir Erna og Hrefna og Guðrún Gísladóttir.