Í leiknum gegn Englandi var stuðullinn 9. Þetta þýðir einfaldlega það að ef einhver leggur undir hundrað Evrur á íslenska sigur, fær viðkomandi greitt 900 Evrur út. Óvænt úrslit þýða að veðmálafyrirtækin verða að punga út. Ómögulegt er að meta hversu miklir fjármunir eru undir en það má meta sem svo að tap veðmálafyrirtækjanna skipti hundruðum milljóna króna.
Og nú er stuðullinn í Frakklandsleiknum hjá Betsson enn 9. Menn eru bókstaflega með hjartað í buxunum, hann skelfur bransinn segir einn sem þekkir vel til, í samtali við Vísi. Þetta er stórkostlegt fyrir knattspyrnuna en ef Ísland vinnur er það hræðilegt fyrir veðmálafyrirtækin.

Í Evrópu er Bewin líkast til stærsta veðmálafyrirtækið, og LadBrokers sem stendur á gömlum merg. Og Bet365 er einnig umfangsmikið á þessu sviði. Betsson er stærsta veðmálafyrirtæki á Norðurlöndum, með yfir þúsund starfsmenn. UniBet er svo næst stærst á Norðurlöndum.
Veðmálastuðullinn er reiknaður eftir kúnstarinnar reglum. Einhver sérhæfð fyrirtæki sem gefa út þessa stuðla. En, svo aðlaga veðmálafyrirtækin þá eftir því hvernig veðmálin þróast og eftir stöðu áhættugreiningu sem er uppfærð reglulega. Menn geta verið að veðja í dag og fengið stuðul, sem ekki verður sá sami á morgun, ef veðjað er þá. Einkennilegt í því ljósi að Betsson fari aftur af stað með stuðulinn 9 í því ljósi. Það getur allt gerst, liðið hefur sýnt það.
Skelfilegt fyrir veðmálafyrirtækin ef Frakkland tapar
Óhætt er að segja að skjálfti sé í Evrópu sökum velgengni Íslands, sem flestir virðast halda með. Í Svíþjóð, Noregi og Danmörku leggja flestir undir á Ísland og styðja liðið veðmálafyrirtækjunum til mikillar hrellingar.

Sláandi hlutfall og mikil hollusta
Tabone segist aldrei hafa séð eins marga viðskiptavini á Íslandi veðja og þá veðja á sitt lið. „Þeir veðja með hjartanu og það hefur hingað til borgað sig. Þeir voru að fá að meðaltali 95 Evrur eftir að hafa lagt 10 Evrur undir, á leikinn gegn Englandi.“
Gróft metið veðjuðu 80 prósent hinna íslensku viðskiptavina á sigur sinna manna í venjulegum leiktíma. Jeff Tabone segir þetta sláandi hlutfall og sýna áður óþekkta hollustu meðal þeirra sem veðja; þegar peningar eru annars vegar reyna menn að halda tilfinningum sínum í skefjum þó almennt vilji fólk veðja á góða útkomu sinna manna.
„En, þetta er með ólíkindum í ljósi þess að meðal þeirra sem búa utan Norðurlanda var Ísland talið ólíklegur sigurvegari, það var metið sem einn á móti tæplega tíu.“
Ekki fleiri veðjað á lið með svo lágan stuðul
Jeff Tabone segir þá hjá Betsson aldrei hafa séð annað eins. Aðeins tíu prósent á Norðurlöndum veðjaði með Englandi og tíu prósent veðjaði á jafntefli eftir venjulegan leiktíma.
„Við vorum að sjá mjög mikinn áhuga á þessum leik í Svíþjóð og Noregi,“ segir Tabone og rýnir í tölur sínar. „En, hvergi eins ofboðslegan og á Íslandi. Veðmálin voru miklu fleiri á lið með svo lágan stuðul en áður hefur sést. Og svo virðist sem Svíar tengi sig við Lars Lagerbäck. Aðrar þjóðir, á meginlandi Evrópu, veðjuðu í miklum meirihluta, eða 85 prósent, á sigur Englands. Sem er hátt hlutfall. Þannig að ... enn er efasemdamenn um íslenska liðið að finna þar,“ segir Jeff Tabone.