Eini Nissan Skyline R34 bíll landsins

Aðeins eitt eintak er til hér á landi af söfnunarbílnum Nissan Skyline af gerðinni R34 og eigandi hans Tómas Kristjánsson. Þetta er bíll sem kom til landsins í mars 2006 eftir að hafa verið 10 mánuði á leið frá Japan, þar af um 6 mánuði í Bretlandi til að fá Evrópuvottun. Þá var hann keyrður 67.000 kílómetra en í dag um 112.000 km. Það telst ekki mikil keyrsla á ári, sem títt er með svo verðmæta söfnunargripi.

Bíllinn er 18 ára gamall og er töluvert af hlutum í honum sem eru langt á undan sinni samtíð. Vél, drif og gírkassi í þessum bíl eru allt gríðarlega sterkir hlutir og þótt aflið sé nægt þá hefur ekkert bilað í þessum bíl síðan hann var fluttur inn, annað en venjulegir viðhaldshlutir eins og bremsur og slíkt.

Það hefur líka verið mikið aðhald með öllum hlutum í þessum bíl. Vélin er ekki farin að leka neinni olíu og hún er yfirleitt það hrein að þegar eigandinn tappar af honum olíunni getur hann notað hana á aðra bíla sína. Það eru innan við 10 Skyline bílar á landinu og þetta er sá eini sem er R34 modelið. Flestir eru af eldri R33 gerð og örfáir af R32 gerð.

280 hestöfl frá verksmiðju en mun öflugri

Bíllinn er gefinn upp 280 hestöfl frá verksmiðju. Hann kom til landsins frá Japan fyrir rúmum 10 árum og hefur eigandi hans keyrt hann rúmlega 40.000 kílómetra á þeim tíma, sem ekki telst mikið. Undanfarin ár hefur hann verið keyrður innan við 1.000 km á ári en samt alltaf skipt um olíu á vorin. Bíllinn hefur verið tekinn af númerum og geymdur inn í bílskúr yfir vetrarmánuðina og alltaf verið svampþvegin og bónaður reglulega. Skipt var um tímareim og allar aðrar reimar í 90.000 km.

Ótrúlega tæknivæddur bíll þó 18 ára sé 

Tómas á alla original hluti sem hafa verið teknir úr bílnum, en ýmsu góðgæti hefur verið bætt við hann. Meðal þess er nýtt 3 tommu pústkerfi, K&N olíusía, boost controller, AX53B70 túrbína og 18 tommu Enkei álfelgur. Bíllinn er með afturhjólastýringu sem eykur akstursgetu bílsins og minnkar mjög beygjuradíus hans. Tiptronic skipting með skiptitökkum eru í stýri bílsins og hann er ótrúlega fullkominn bíll miðað við það að hann var framleiddur fyrir 18 árum síðan.

Þetta eintak er nánast í fullkomnu ástandi og eins og nýr að sjá og allt virkar í bílnum. Hér er því um afar verðmætt eintak af bílnum að ræða og víst að mikið fé mætti fá fyrir bílinn, en þessir bílar eru vinsæl söfnunareintök um allan heim og mjög eftirsóttir í Bandaríkjunum.