Eyþór Árnason, ljósmyndari Vísis og Fréttablaðsins, var á leiknum í kvöld og náði þessum myndum hér fyrir ofan.
Stjörnukonur gerðu út um leikinn með þremur mörkum á síðustu fimm mínútunum í fyrri hálfleik.
Harpa Þorsteinsdóttir hefur þar með skorað þrettán mörk í fyrstu níu leikjum Stjörnuliðsins í sumar og er markahæsti leikmaður deildarinnar.
Stjarnan hélt þar með marki sínu hreinu í fyrsta leiknum eftir að liðið endurheimti landsliðskonuna Önnu Björk Kristjánsdóttur. Anna Björk kom á láni frá sænska liðinu Örebro þegar félagsskiptaglugginn opnaði.
Stjörnuliðið missti hina öflugu Donna Key Henry meidda af velli strax á 6. mínútu. Varamaður hennar, hin 19 ára gamla María Eva Eyjólfsdóttir, fiskaði hinsvegar vítið sem gaf fyrsta mark Stjörnunnar á 41. mínútu.
Aðeins fimm mínútum síðar var staðan orðin 3-0. Agla María Albertsdóttir skoraði fyrst á 45. mínútu og svo skoraði Harpa sitt annað mark í uppbótartíma fyrri hálfleiks með síðustu snertingu fyrri hálfleiksins.
Stjörnukonur afgreiddu leikinn með þessum fimm mínútna draumakafla og eftir það var leikurinn í öruggum höndum Garðbæinga.
Upplýsingar um markaskorara eru fengnar frá vefsíðunni fótbolti.net.
