85 laxa holl í Laxá í Dölum

Það fer vonandi að sjá fyrir endann á tökuleysinu á vesturlandi og nýjar fréttir úr dölunum vonandi styrkja þá von.

Laxá í Dölum var í 301 laxi þegar vikutölur síðustu viku voru gerðar up en sú tala er búin að hækka hratt síðustu daga.  Holl sem lauk veiðum í dag var með 85 laxa á þremur dögum á aðeins fjórar stangir sem er besta hollið í ánni í sumar.  Heildarveiðin í Laxá var 1.578 laxar í fyrra og þar sem áin er þekkt fyrir oft svakalegann lokasprett verður að segjast eins og er að útlitið er bjart í dölunum.

Það er gott magn af laxi í ánni og svipaða sögu má segja um fleiri ár á vesturlandi sem þó hafa orðið fyrir barðinu á tökuleysinu síðustu tíu daga eða svo.  Upp úr þessu tökuleysi standa þó Laxá í Dölum og Haukadalsá en af hverju það er er erfitt að segja.  Sumir hafa haldið því fram að það sé vegna þess að þær séu að fá göngur í ánna núna sem séu vanalega að detta inn í byrjun ágúst en það er auðvitað ekki hægt að sanna neitt í þeim efnum.  Við fögnum þessu og vonum að takan fari að hressast í hinum ánum í þessum landshluta.