Kæra andlát Nóa Hrafns til lögreglu

Sigríður Eyrún Friðriksdóttir og Karl Olgeir Olgeirsson hafa kært andlát sonar síns til Lögreglunnar á höfuðborgarsvæðinu. Kæran var lögð fram í gær. Sigríður og Karl sögðu frá fæðingu og andláti Nóa Hrafns í Kastljósþætti á þriðjudagskvöld. Sigríður og Karl munu einnig krefjast skaða- og miskabóta úr hendi spítalans upp á tugi milljóna króna. Greint var frá kærunni í kvöldfréttum RÚV í gær.

Í hádegisfréttum Bylgjunnar í gær sagði Ólafur Baldursson, forstjóri lækninga á Landspítala, að spítalinn vinni nú að umbótum vegna málsins, til að tryggja að slíkt eigi sér ekki stað aftur.

„Þetta mál hefur gríðarlegar afleiðingar. Þetta er ólýsanlegur harmleikur fyrir foreldrana og við á landspítalanum tökum þetta mál mjög alvarlega. Það er enginn sem vill að neitt af þessu tagi endurtaki sig og við höfum nú þegar lagt okkur mjög fram um að tryggja að þetta geti ekki endurtekið sig,” sagði Ólafur.

Ráðist hefur verið í umbætur

Aðspurður segir Ólafur að þegar hafi verið ráðist í umbætur vegna málsins. „Það hefur þegar verið ráðist í þá vinnu sem við leggjum þunga áherslu á. Sú vinna varðar bæði samskipti, samvinnu og ýmis konar tæknilausnir sem bæta eftirlit með fæðingum.“

Í viðtali í kvöldfréttum RÚV sagði Ólafur að lagaramminn sé óskýr og orðalagið óljóst. Óskað hefur verið eftir því að breytingar verði gerðar á lögum og ákvæðið skýrt. Sú beiðni liggur nú á borði velferðarráðuneytisins.

„Og það er því miður þannig að mál Nóa Hrafns var óskýrt í okkar huga, hvort við ættum að tilkynna það til lögreglunnar eða ekki, og það er þess vegna gríðarlega brýnt að þessari vinnu verði lokið sem allra first,” sagði Ólafur.

Aðspurður sagði Ólafur að ekki sé hægt að útiloka að aðstæður innan landspítalans hafi haft áhrif á mál Nóa Hrafns. Verkföll ljósmæðra og lækna voru þá nýafstaðin og mál hjúkrunarfræðings, sem síðar fór fyrir dómstóla, var þá til rannsóknar. „Það er aldrei hægt að útiloka slíkt. En við höfum svo sem engar sönnur fyrir því að svo hafi verið,“ sagði Ólafur.

Alltaf eigi að kalla til lögreglu

Birgir Jakobsson landlæknir segir að kalla eigi til lögreglu ef einhver deyr af óljósum ástæðum á Landspítalanum svo að ganga megi úr skugga um að ekkert brotlegt hafi átt sér stað.

„Hins vegar finnst mér að þegar það er óvissa um tilkynningaskyldu til lögreglu þá er betra að tilkynna oftar en sjaldnar. Það verður að leita af sér allan grun og það verður að gera það alveg í byrjun. Þess vegna er mjög mikilvægt að svona hlutir séu tilkynntir strax til lögreglu,“ sagði Birgir.