Lokatölur komnar úr flestum laxveiðiánum

Lokatölur eru nú komnar úr flestum laxveiðiánum og þegar tölurnar eru skoðaðar nánar mega veiðimenn heilt yfir vel við una.

Sumarið fór af stað með svo miklum hvell að flestir veiðimenn voru farnir að sjá fyrir sér annað metsumarið í röð.  Það fór nú svo að göngurnar voru um þremur vikum á undan áætlun svona heilt yfir og komu á mjög stuttum tíma en dreifðust ekki yfir nokkrar vikur eins og gerist yfirleitt.  Undantekningin er þó í nokkrum ám eins og í Haukadalsá, Laxá í Dölum, Miðfjarðará og Ytri Rangá en í þeirri síðast nefndu hafa verið að veiðast lúsugir laxar í september og er það ekki nýtt af nálinni í þeirri á.  Veiði er þó ekki ennþá lokið í Rangánum og á líklega eftir að bætast aðeins á töluna þar.

Smálaxagöngurnar voru ekki alveg jafn stórar og búist var við en það kom þó varla að sök því þetta sumar fer klárlega í bækurnar sem eitt besta stórlaxasumar í háa herrans tíð.  Sjaldan eða líklega aldrei hafa jafn margir laxar veiðst yfir 100 sm í Íslenskum ám og sá stærsti í sumar 120 sm úr Laxá í Aðaldal.

Af ánum sem eru á topp tíu listanum þá fóru Ytri Rangá, Eystri Rangá, Laxá í Dölum og Laxá í Aðaldal yfir veiðina í fyrra.  Þegar listinn er skoðaður enn frekar þá eru árnar þar fyrir neðan undir veiðinni í fyrra nema Miðá í Dölum.  Það rokkar síðan svolítið hversu mikið yfir eða undir meðalári árnar eru en almennt gera veiðimenn góðann róm af sumrinu en helst kvarta menn yfir vatnsleysi sem hrjáði árnar á stórum hluta landsins yfir besta tímann í sumar og ljóst að ef vatnsstaðan hefði verið betri hefði klárlega veiðst meira.  Árnar sem eru efstar eftir sumarið, a.m.k. þær sem hafa skilað lokatölum er hér að neðan en listann í heild sinni má finna á www.angling.is

Ytri Rangá - 8.935

Miðfjarðará - 4.338

Eystri Rangá - 3.219

Blanda - 3.219

Þverá/Kjarrá - 1.902

Laxá í Dölum - 1.711

Langá - 1.433

Haffjarðará - 1.305

Norðurá - 1.297

Laxá í Aðaldal - 1.207