Barði með frábært lag og myndband úr leikverkinu Brot úr hjónabandi

Tónlistarmaðurinn Barði Jóhannsson hefur nú gefið út nýtt lag og myndbandið fyrir sýninguna Brot úr hjónabandi sem er í sýningu í Borgarleikhúsinu. Lagið ber nafnið Dive into the deep blue sea.

Sýningin hefur fengið glimrandi góða dóma og er uppselt á allar 18 sýningarnar sem framundan eru.

Verkið fjallar um fyrirmyndarhjón sem gengur vel í starfi, eiga tvö börn og hjónaband þeirra virðist endalaus hamingja þar til annað kemur í ljós.

Við tekur hressandi kvöldstund þar sem allt er gert upp: Hjónabandið, sambandið, vináttan, kynlífið, draumarnir, gleðin, sorgin, vonin og frelsið – og öll uppáhaldslögin.

Verkið byggir á sex þátta sjónvarpsseríu Ingmars Bergman sem sýnd var í sænska sjónvarpinu árið 1973 við svo miklar vinsældir að götur Svíþjóðar tæmdust. Uppsetning Borgarleikhússins er í leikstjórn Ólafs Egilssonar sem einnig gerir leikgerðina.

Hér að neðan má sjá myndbandið við lagið sem Barði samdi sérstaklega fyrir verkið en það er Esther Talía Casey sem syngur.