Hljómsveitin GlowRVK frumsýnir nýtt myndband: Færa þér tíunda áratug síðustu aldar beint í æð

Það er óhætt að segja að lagið Camo og myndbandið við það færi þér tíunda áratug síðustu aldar beint í æð. Fyrir þá sem vörðu unglingsárunum í að horfa á vídeóspólur og spila dag og nótt í Nintendo leikjatölvum er myndbandið hrein unun að horfa á.

Lagið Camo er innblásið af frasanum sjálfum og enska orðinu sem hann er dreginn af það er Camoflage. Þannig er það um að halda ró sinni í erfiðu aðstæðum og ná að sleppa úr þeim með því að vera alltaf tilbúinn. Ef maður fellur inn í umhverfið kemst maður frá flestu og felulitirnir, sem við öll notum stundum, gera þar sitt gagn.

Myndbandið er unnið af hljómsveitinni GlowRVK í samstarfi við Pétur Eggerz og Arnfinn Rúnar hjá Motive.

GlowRVK er nýleg Electro-hljómsveit frá Reykjavík. Bjarni Freyr Pétursson og Sylvía Björgvinsdóttir eru uppistaðan í henni. Hljómsveitin hefur spilað víða síðastliðið ár og hefur þessi nýstárlega raftónlist heillað marga. Tónlist þeirra er undir áhrifum ólíkra strauma innan raftónlistarheimsins. Bjarni Freyr samdi lagið Camo og útsetti það. Á næstunni ætlar hljómsveitin að vinna plötu í fullri lengd og gefa út fleiri ný lög. Tilgangur tónlistar GlowRVK er í raun einfaldur það er að fá fólk til að finna gleðina og dansa.