35 ára afmæli Sportveiðiblaðsins á árinu

Sportveiðiblaðið fagnar 35 ára afmæli sínu á þessu ári en frá upphafi hafa verið gefin út 80 blöð sem unnendur stangveiði hafa ávallt lesið upp til agna.

 

"Já það er rétt að við eigum 35 ára afmæli hjá Sportveiðiblaðinu og það verður ýmislegt gert til að minnast þessa áfanga hjá okkur með þessari útgáfu" segir Gunnar Bender ritstjóri Sportveiðiblaðsins í samtali við Veiðivísi.  "Fyrsta blaðið kom út 1981 og þar var meðal annars viðtal við Gulla Bergmann en síðan er búið að birta yfir 100 viðtöl og koma út um 80 blöðum" bætir Gunnar við.

"Við erum á fullu að vinna afmælisblaðið, en það á koma út fyrir páska um leið og sjóbirtingsveiðin er nýbyrjuð. Auðvitað hefur þetta stundum verið slagur en allt hefur þetta blessast. Lesendur hafa haldið tryggð við okkur enda við fáum mikið efni frá þeim, myndir og texta. Síðan höfum við verið mjög heppnir með viðtalsefni í blaðinu.  Það verða þrjú blöð á þessu ári og síðan verðum við með eitthvað óvænt fyrir lesendur okkar og aðra".  Varðandi veiðina á komandi sumri sagði Gunnar "Veturinn er búinn að vera frábær en hann er ekki búinn ennþá en það er enginn snjór og það verður vandamálið í sumar. Auðvitað getur komið einhver snjór í vetur ennþá en varla nóg úr því sem komið er, sama spá dag eftir dag. Það verður í staðinn bara að rigna mikið í sumar en smálaxinn kemur vonandi í miklum mæli og sumarið verður gott".  Við óskum Gunnari og félögum til hamingju með árin 35 með Sportveiðiblaðið og lesendur Veiðivísis bíða líklega spenntir eins og aðrir sportveiðimenn eftir afmælisblaðinu.