Ljós skipta miklu máli á heimilum

KYNNING Ljósadeildin í BYKO er ævintýri líkust. Það blasa við glitrandi ljósakrónur, nýtísku víraljós, gamaldags loftljós, fallegir kúplar og allt þar á milli, að ógleymdum smart lömpum á borð eða gólf.

Bjarni Ólafur Bjarnason deildarstjóri og annað starfsfólk ljósadeildarinnar tekur vel á móti viðskiptavinum, enda er það hafsjór fróðleiks þegar kemur að lýsingu fyrir heimilið. „Við leggjum mikið upp úr að bjóða gott úrval af ljósum við allra hæfi, hvort sem fólk vantar ljós fyrir fyrsta heimilið eða vill breyta til eða endurnýja og skipta út eldri ljósum. Við þjónustum einnig verktaka og þá sem eru að setja upp ljós í blokkir eða heilu húsin,“ segir Bjarni en hann fylgist vel með nýjungum á þessu sviði.

LED-perur eru framtíðin

Inntur eftir tískusveiflum í ljósum segir hann allt vera í gangi en áberandi sé að yngra fólk velji víraljós eða grindarljós en þá sjást ljósaperurnar vel. „Nýja peran frá OSRAM kallast 1906 LED og hún er mjög vinsæl í slík ljós. Peran sjálf er falleg og stendur fyrir sínu ein og sér. Annars eru hefðbundnir kúplar alltaf vinsælir og hangandi ljós í öllum stærðum og gerðum.“

Lýsingin skiptir miklu máli á hverju heimili og því þarf að vanda valið vel. „Í dag er þróunin yfir í LED-ljós, sem er tvímælalaust framtíðin. Við erum með mesta úrvalið á landinu af perum frá OSRAM og þar eru LED-perurnar fremstar í flokki. LED-perurnar eru með lengri líftíma og eyða minna rafmagni. Þær gefa frá sér þetta hvíta ljós sem fólk sækist gjarnan eftir og ljósstyrkurinn er svipaður og var á gömlu glóperunum. Til lengri tíma litið ætti notkun á LED-perum að lækka rafmagnsreikninginn á heimilinu en þær eiga að endast í allt að fimmtán þúsund klukkutíma,“ útskýrir Bjarni.

Umhverfisvænar perur

Stofnkostnaðurinn við að skipta yfir í LED-perur er dálítill í upphafi en það er fljótt að borga sig upp með lægri rafmagnsreikningi. Þær eru einnig umhverfisvænar, það kviknar strax á þeim og lítill hiti stafar frá ljósinu sjálfu. „LED-perur hafa mikið þol gegn hristingi og titringi og gefa ekki frá sér útfjólubláa eða innrauða geisla,“ segir Bjarni og bendir á að LED-perur séu umhverfisvænar og þeim eigi að skila til endurvinnslu. „Við hjá BYKO tökum á móti perum til förgunar.“

Lightify gerir lífið litríkara

Helsta nýjungin í ljósadeild BYKO er nýtt ljósakerfi frá OSRAM sem kallast Lightify og er stórsnjallt. Lightify-kerfið er algjör bylting á þessu sviði en um er að ræða einfalda ljósastýringu sem hentar vel á öll heimili.

„Lightify er einfalt kerfi sem gerir fólki kleift að stjórna lýsingunni á heimilinu eins og því hentar, í símanum. Hægt er að stýra snjallperum, innanhúss sem utan, á einfaldan hátt með appi í símanum. Appið má nota til að kveikja og slökkva, auka eða minnka ljósmagn eða breyta um lit. Ljósunum er hægt að stjórna hvar sem er, og því er þetta ekki síst sniðugt ef fólk er á ferðinni því þá virka ljósin sem þjófavörn. Þetta er ótrúlega einföld lausn sem auðvelt er að setja upp,“ segir Bjarni.

Virk vefverslun

BYKO þjónustar ekki aðeins höfuðborgarsvæðið heldur einnig landsbyggðina því rekin er öflug vefverslun á www.byko.is. „Það er alltaf nokkuð um að fólk kaupi ljós í gegnum netið og svo sendum við auðvitað hvert á land sem er."