Snýr Volgan aftur?

Hver man ekki eftir Volga bílunum rússnesku sem komnir eru á einhvern aldur? Nú gætu bílar með Volga merkinu snúið aftur á næstunni, en framleiðslu þeirra var hætt árið 2010. Volga er hluti af GAZ Group sem framleiðir mestmegnis atvinnubíla og er með höfuðstöðvar í Nizhny Novgorod í Rússlandi.

Síðasti fólksbíll Volga bar nafnið Siber og var systurbíll Chrysler Sebring. Volga var áður þekkt fyrir að smíða lúxusbíla, að minnsta kosti á rússneska vísu. Ef að framleiðslu Volga bíla verður munu þeir ekki verða lúxusbílar heldur smáir bílar og smáir sendibílar á stærð við Volkswagen Caddy.

GAZ framleiðir nú sendibílinn GAZelle, en ef að Volga sendibíl yrði, væri hann talsvert minni bíll. GAZelle er einn bíla í línu GAZ sem inniheldur pallbíla, sendibíla, litla strætisvagna og fjölnotabíla. Ástæðan fyrir GAZ að nota áfram merki Volga er að ímynd þess er sterk í Rússlandi og þekkt fyrir að smíða sterka bíla sem bila lítið og það væri ekki slæmt orðspor fyrir vinnubíla, hvað þá fólksbíla fyrir almenning.

Nýir Volga bílar yrðu samt á lágu verði. Lokaákvörðun hefur ekki verið tekin innan herbúða GAZ og ef hún yrði jákvæð er ekki ljóst hvort að Volga bílar yrðu byggðir á nýjum undirvagni eða á undirvagni annarra þekktra framleiðenda.