Frýs í lykkjum og takan eftir því

Það er ekki á vísan að róa þegar haldið er í veiði á þessum árstíma enda verða veiðimenn að vera þannig búnir að þeir geti tekist á við hvað sem er.

Það hefur verið býsna kalt víða á landinu og þeir veiðimenn sem hafa verið að freysta gæfunnar fyrir norðan á sjóbirtingsslóðum hafa varla undan að brjóta klaka úr lykkjunum og veiðin verið erfið eftir því.  Það kroppast þó upp og ekki er annað að heyra á þeim sem eru við bakkana að veiðin sé alveg í takt við væntingar og flestir að ná einhverju.  Bestu fréttirnar hafa verið úr Tungulæk þar sem síðasta holl var með hátt á fimmta tug sjóbirtinga sem veiddust mest á stöðum neðst í ánni.  Það er að sögn mikið af fiski á þessum slóðum og hann verður líklega þarna áfram þangað til hlýnar aðeins en þá gusast fiskurinn úr ánum og fer til sjávar.

Veðurspáin á veiðimenn um páskahelgina er heldur köld og rysjótt svo það er líklega ágætt að minna þá sem ætla að fara að veiða að taka með sér allt safnið af undirfötum, prímus og kaffi, nóg af kaffi! Það má kannski skjóta að einu ágætu ráði varðandi þegar það frýs í lykkjunum en það er að bera varasalva í lykkjurnar.  Hann hrindir frá þér vatni mjög hratt og kemur í veg fyrir þennan leiðindar fylgifisk fluguveiða í kulda.