Gera ekki kjarnorkutilraunir en spila þess í stað blak

Svo virðist sem að Norður-Kóreumenn séu hættir að undirbúa sína sjöttu tilraunasprengingu á kjarnorkuvopni. Þess í stað er verið að spila blak á tilraunastaðnum, Punggye-ri. Nýjar gervihnattarmyndir frá svæðinu hafa vakið furðu sérfræðinga, sem hafa þó bent á tvær mögulegar ástæður fyrir blakspiluninni.

Myndin hér fyrir ofan, sem tekin var á sunnudaginn, var birt af 38 North verkefninu hjá Johns Hopkins háskólanum í Bandaríkjunum. Allt í allt sáust þrír blakleikir eiga sér stað á mismunandi stöðum í Punggye-ri.

Fyrri myndir höfðu gefið í skyn að undirbúningur hefði staðið yfir fyrir nýja tilraunasprengingu.

Sérfræðingar þar segja að annað hvort hafi undirbúningur nýrrar tilraunasprengingar verið stöðvaður, eða blakspilunin sé liður í blekkingarleik stjórnvalda í Pyongyang. Hins vegar virðist ljóst samkvæmt sérfræðingum 38 North að verði skipun um nýja tilraun gefin, sé hægt að framkvæma hana á skömmum tíma.

Mikil spenna hefur ríkt á svæðinu og hafa viðvaranir gengið á víxl.

Sjá einnig: Hóta því að gera Bandaríkin að „rjúkandi rústum“

Sérfræðingar sem BBC ræddi við segja myndirnar sýna að mögulega hafi gangnagerð átt sér stað í Punggye-ri, en svo virðist sem ekki sé verið að dæla vatni upp úr göngunum þar sem kjarnorkusprengjur hafa verið sprengdar áður.