2.551 bíll seldur á 3 vikum

Mikil og góð sala er í nýjum bílum um þessar mundir og á fyrstu 3 vikum mánaðarins hafa verið skráðir 2.551 nýir bílar hjá Umferðarstofu. Á þessum fyrstu þremur vikum eru 14 virkir dagar en mánudagurinn 1. maí var frídagur, svo segja má að afgreiddir hafi verið 182 bílar á hverjum virkum degi mánaðarins hingað til.

Í maí í fyrra seldust 3.392 nýir bílar og voru virkir dagar mánaðarins 20 talsins og því voru afgreiddir 170 bílar á hverjum virkum degi í sama mánuði í fyrra. Því er ekki mikill munur á maí mánuði í ár og í fyrra, þó örlítið meiri sala sé í ár. Búast má við að stór hluti þessarar góðu sölu bílaumboðanna sé til bílaleiga, en á þessum tíma árs eru þær að birgja sig upp af bílum fyrir annasamt sumarið.

Af einstaka bílgerðum er Toyota söluhæst með 544 selda bíla, Hyundai með 324, Skoda með 231, Kia 220 og Volkswagen 183. Eins og hingað til í ár er BL söluhæsta umboðið í mánuðinum og er með 26,5% hlutdeild og 675 selda bíla. Næst á eftir kemur Toyota/Lexus með 548 bíla og 21,5% hlutdeild, Hekla með 449 bíla og 17,6% hlutdeild og Brimborg með 296 bíla og 11,6% hlutdeild.