Ölvuð kona ók á útsýnispall utan við Akureyri

Kona á fimmtugsaldri var handtekin eftir að hún ók ölvuð utan í útsýnispall austan við Akureyri í hádeginu eftir að lögreglu bárust tilkynningar frá athugulum vegfarendum.

Atvikið átti sér stað á þjóðveginum austan við Akureyri um hádegið í dag samkvæmt upplýsingum lögreglunnar á Akureyri. Konan ók utan í skilti og útsýnispall og skemmdi bíl sinn töluvert.

Þrátt fyrir það hélt konan för sinni áfram áleiðis til Akureyrar þar til bílinn gaf loks upp öndina. Þar handtók lögreglan hana og færði til sýna- og skýrslutöku.

Konunni var sleppt af því loknu. Lögreglan segir að bíllinn sé í „vægast sagt lélegu ástandi“.