Fyrsti laxinn úr Vatnsdalsá af silungasvæðinu

Nú berast fréttir úr þeim ám sem þegar hafa opnað fyrir veiðimönnum og það er óhætt að segja að þetta sumar fer afskaplega vel af stað og lofar mjög góðu um framhaldið.

Þrátt fyrir að laxveiði sé ekki hafin á laxasvæðinu í Vatnsdalsá er veiði hafin á silungasvæðinu og þar kom fyrsti laxinn upp í gær.  Veiðimaðurinn var Andri Freyr Björnsson og veiddi hann þessa fallegu hrygnu sem sést með honum á myndinni.  Hrygnan var 86 sm og grálúsug en hún tók hvítan Nobbler á veiðistaðnum Brandanes vestra á silungasvæðinu.  Viðureignin var bardagi af bestu gerð og var hrygnunni landað faglega, mynduð og sleppt enda hefur hann Andri sem er með efnilegri veiðimönnum landsins fengið gott veiðiuppeldi af manni sem kann sitt fag.

Það verður spennandi að fylgjast með þeim opnunum sem eftir eru en hingað til hafa árnar opnað með glæsibrag og þess vegna ekki annað hægt en að vera vongóður um framhaldið.