Ráðstefnuborgin Reykjavík komin á heimsmælikvarða

Reykjavík hefur verið útnefnd besti ráðstefnu- og fundarstaður Evrópu af virtu viðskiptatímariti. Framkvæmdastjóri Ráðstefnuborgarinnar Reykjavík segir þetta hjálpa til við að kynna borgina enn betur en mikil fjölgun hafi orðið á stórum ráðstefnum í Reykjavík á undanförnum árum.

Þetta er í þriðja sinn á stuttum tíma sem Business Destination tímaritið veitir Íslendingum verðlaun. harpa fékk verðlaunin í fyrra í hópi ráðstefnuhúsa en árið 2015 fékk fríhöfnin á Keflavíkurflugvelli verðlaunin í sínum flokki. Í ár er það svo Reykjavíkurborg í heild sem fær þessi verðlaun.

Framkvæmdastjóri Ráðstefnuborgarinnar Reykjavík, eða Meet in Reykjavík, segir að fjöldi ráðstefna með fleiri en þúsund þátttakendum hafi tólffaldast frá því starfsemi hófst í Hörpu.

Er þetta mikilvægt?

„Þetta skiptir okkur gríðarlega miklu máli. Þetta er í raun staðfesting á getu Reykjavíkurborgar og staðsetningu borgarinnar sem alþjóðleg ráðstefnuborg,“ segir Þorsteinn Örn.

Að þessu hafi fjölmargir aðilar unnið árum saman og nú sé það staðfest að Reykjavík sé á heimsmælikvarða í ráðstefnuhaldi. Enda hafi vöxturinn á ráðstefnum verið mikill.

„Vöxturinn í fyrra var 21 prósent. Hann hefur að vísu ekki verið þessi þrjátíu til fjörutíu prósent sem heildin hefur verið. En engu að síður margfalt á við það sem gerist í þessum geira. Þarna erum við líka að tala um ferðamenn sem koma jafnt yfir árið. Þeir eyða um helmingi meira hverja gistinótt sem skiptir okkur gríðarlegu máli út frá  hagvexti eða út frá tekjum innan greinarinnar,“ segir Þorsteinn Örn.

Þá sé þetta til verulegra hagsbóta fyrir háskóla- og fræðasamfélagið og lyfti því upp í alþjóðlegu fræðasamfélagi og iðnaði. Þessi verðlaun nýtist vel við markaðssetningu á Reykjavík.

„Þá skiptir okkur miklu máli ef við getum sýnt fram á þessa getu, innviði og faglegheit til að ná fólki hugrænt inn í þá aðstöðu að sjá Ísland, eða Reykjavík, sem góðan áfangastað fyrir ráðstefnur,“ segir Þorsteinn Örn Guðmundsson.