103 sm lax sá stærsti það sem af er sumri

Þrátt fyrir að laxveiðitímabilið sé ekki einu sinni komið þriðjung leiðar sinnar eru þegar farnar að berast fréttir af stórlöxum.

Fyrstu fréttir af stórlaxo kom úr Norðurá en þar var 102 sm laxi landað í opnun en það er sannarlega fréttnæmt að fá lax af þessari stærð í Norðurá.  Laxá í Kjós hefur einnig gefið einn í þessari stærð en Vatnsdalsá bætti um betur og þar var landað 103 sm laxi á föstudaginn sem er sá stærsti sem við höfum staðfestar fréttir af í sumar.  Laxinn veiddist í Birgishyl og tók fluguna Frigga.  Daginn eftir kom síðan 100 sm lax upp úr Hnausastreng og tók sá fiskur gárutúpu eða hitch.

Byrjunin á þessu veiðisumri þykir gefa ágætan takt inní sumarið og enn sem komið er virðast göngur vera góðar og smálaxinn að skila sér inn í meiri mæli en í fyrra og á þetta sérstaklega við í Borgarfjarðaránum en fréttir af mjög flottum göngum sem komu inn á síðdegisflóðinu í gær hafa verið að berast en takan hefur þrátt fyrir það ekkert farið í gang af sama krafti.  Skýringin liggur fyrst og fremst í því að það er mjög gott gönguvatn í ánum og laxinn á mikilli ferð en þegar hann fer að stoppa aðeins í hyljunum má alveg búast við því að veiðitölurnar fari að rjúka upp.