Valtteri Bottas á ráspól í Austurríki

Valtteri Bottas á Mercedes náði ráspól í Austurríki. Sebastian Vettel á Ferrari varð annar og Lewis Hamilton á Mercedes þriðji en Hamilton ræsir áttundi vegna fimm sæta refsingar.

Hamilton fær refsingu fyrir að skipta of snemma um gírkassa í bíl sínum. Bottas ók frábærlega og tryggði sér sinn annan ráspól á árinu.

Fyrsta lota

Kevin Magnussen braut spyrnu vinstra megin að aftan á Haas bílnum. Á meðan fór Romain Grosjean á hinum Haas bílnum yfir malargryfju og þurfti að koma inn á þjónustusvæðið til að láta hreinsa möl undan bílnum.

Þrátt fyrir þetta komust báðir Haas ökumennirnir áfram í aðra umferð.

Þeir sem féllu út í fyrstu umferð voru; Sauber ökumennirnir, Williams ökumennirnir og Jolyon Palmer á Renault.

Williams mennirnir náðu engu gripi niður í brautinni. Á meðan Hamilton var fljótastur í lotunni.

Önnur lota

Hamilton lagði af stað í lotuna með ofur-mjúk dekk undir bílnum, öfugt við aðra fremstu ökumenn sem voru á últra-mjúkum dekkjum.

Hamilton lagði af stað í tímatökuna vitandni að hann ætti von á afturfærslu um fimm sæti á ráslínu. Mercedes liðið setti nýjan gírkassa í bíl Hamilton fyrr en heimilað er og því þurfti Hamilton að sætta sig við refsinguna. Hugsun Hamilton hefur verið að aka lengra inn í keppnina áður en kemur að fyrsta þjónustuhléi.

Valtteri Bottas var fljótastur í annarri lotu. Þeir sem féllu út voru; Kevin Magnusen á Haas, Daniil Kvyat á Toro Rosso, McLaren ökumennirnir og Nico Hulkneberg á Renault.

Vandoorne var nokkuð jákvæður eftir að hafa fallið úr leik í annarri lotu. Hann sagði: „Við höfum klárlega tekið skref fram á við þessa helgina. Ef við höldum svona áfram þá komumst við þangað sem við viljum fara.“

Þriðja lota

Bottas mætti öflugur til leiks í þriðju lotu. Hann setti hraðasta tímann og þegar tvær mínútur voru eftir hafði enginn skákað honum. Vettel var annar og Hamilton þriðji.

Allt stefndi í spennandi lokahringi þegar Haas bíll Grosjean nam staðar á brautinni og enginn gat bætt sinn tíma.