Þremenningar dæmdir skaðabótaskyldir í Marple-málinu

Héraðsdómur Reykjavíkur féllst á kröfu þrotabús Kaupþings um að Hreiðar Már Sigurðsson, fyrrverandi bankastjóri bankans, Magnús Guðmundsson, forstjóri bankans í Lúxemborg, og Skúli Þorvaldsson, fjárfestir, séu skaðabótaskyldir í Marple-málinu svonefnda. Þrotabúið hafði krafið þá um milljarða króna skaðabætur.

Málið snerist um færslu á fjármunum Kaupþings til félagsins Marple Holding sem Skúli átti í Lúxemborg og kaup bankans á eigin skuldabréfum af Marple.

Fangelsisdómur Hreiðars Más var þyngdur í tólf mánuði í dag og Skúli hlaut sex mánaða dóm. Þetta var í annað skiptið sem Héraðsdómur Reykjavíkur dæmdi í málinu en Hæstiréttur vísaði málinu aftur í hérað vegna vanhæfis meðdómara.

Hreiðar Már var dæmdur fyrir fjárdrátt og umboðssvik sem héraðsdómur taldi hafa leitt til stórfellds fjártjóns almenningshlutafélagsins Kaupþings. Brot Skúla var talið felast í að taka við og geyma ólögmætan hagnað á reikningi félagsins Marple Holding.

Magnús hlaut átján mánaða dóm fyrir sinn hlut í brotunum.

Sjá einnig: Marple-málið: Dómur yfir Hreiðari Má þyngdur

Þrotabú Kaupþings krafðist þess að sakborningarnir fjórir í málinu, þeir Hreiðar Már, Skúli og Magnús auk Guðnýjar Örnu Sveinsdóttur, fyrrverandi fjármálastjóra bankans, yrðu dæmd til að greiða skaðabætur. Guðný var sýknuð í málinu.

Krafðist fallni bankinn þess að fjórmenningarnir greiddu rúma sex milljarða króna, 15,6 milljónir evra og 3,5 milljónir dollara auk vaxta og dráttarvaxta í skaðabætur.

Héraðsdómur féllst hins vegar aðeins á þrautavarakröfur Kaupþings hf. um að viðurkenna skaðabótaskyldu Hreiðars Más, Magnúsar og Skúla gagnvart bankanum.

Þá féllst héraðsdómur á upptöku á rúmlega 6,7 milljörðum króna sem voru á reikingi Marple sem hald var lagt á við rannsókn málsins. Hann hafnaði hins vegar kröfu um að gera eignir Skúla í Lúxemborg upptækar.