Saumar fjölnota poka úr fánum

Sandra Borg Bjarnadóttir stendur að verkefninu Fánapokar þar sem hún býr til fjölnota poka úr fánum sem átti að henda vegna prentgalla. Sandra er fatahönnuður að mennt en sérhæfir sig í umhverfisvænni hönnun. Fánana fær hún úr Fánasmiðjunni. Framleiðslan hófst árið 2012 og hefur vaxið síðan. Pokarnir eru léttir og sterkir enda fánaefni þess eðlis að geta staðið af sér íslenskt veðurfar.

„Ég hef eiginlega varla undan að sauma sjálf og vélarnar sem ég er með eru frekar takmarkaðar; svona heimilsvélar. Ef ég myndi kaupa iðnaðar Overlock saumavél þá yrði ég margfalt fljótari að sauma og ég geri sterkari poka líka,“ segir Sandra og nefnir að hún hafi alltaf unnið að þessu ein.

Sandra framleiðir fimm tegundir af pokum; innkaupapoka, hliðarpoka, Tote poka, sundpoka og flöskusöfnunarpoka sem er vinsælastur. Pokarnir eru umhverfisvænir og eiga að koma í staðinn fyrir einnota poka. Hægt er að styrkja Söndru inn á Karolina fund.

Sandra segir þetta hafa verið aukaverkefni til að byrja með en hafi vaxið hratt undanfarið. Hún er eins og er ekki með saumavél til afnota og vonast til þess að söfnunin geri henni kleift að fjárfesta í saumavél til að halda áfram með framleiðsluna.