Fordæmalausar breytingar á markaðnum

Hlutabréf Haga féllu í dag um rúmlega sjö prósentustig en félagið sendi frá sér afkomuviðvörun eftir lokun markaða á föstudag, þar sem vísað var í harðnandi samkeppni.

Félagið Hagar sem meðal annars rekur verslanir Hagkaupa og Bónuss er eina fyrirtækið á dagvörumarkaði sem er skráð á markað og þarf að tilkynna breytingar á rekstrarhorfum til Kauphallar.

Á föstudagskvöld sendu Hagar frá sér afkomuviðvörun þar sem fram kemur að hagnaður félagsins eftir alla venjulega rekstrarliði fyrir tímabilið mars til ágúst verði um 20 prósent lægri en í fyrra.

Í tilkynningunni segir að breytt staða á markaði hafi mikil áhrif á félagið. Kauphöllinn var opnuð í dag eftir helgarfrí og strax við opnun markaða tóku bréf Haga að falla. Nam heildarlækkun dagsins 7,2 prósentum.

Þetta er í annað sinn síðan Costco var opnað sem Hagar senda frá sér afkomuviðvörun. Í þeirri fyrri sagði einnig að breytt markaðsstaða myndi hafa áhrif á reksturinn. Mark­aðs­verð Haga hefur hríðlækkað eftir innreið Costco. Bréfin hafa lækkað um 28 prósent og markaðsvirði félagsins hefur dregist saman um 18,5 milljarða króna.

Framkvæmdastjóri Samtaka verslunar og þjónustu segir breytingarnar sem eru að eiga sér stað vera fordæmalausar. „Það sem er að gerast á þessum markaði er fordæmalaust. Það eru að koma inn á þennan agnarsmáa íslenska markað tvö alþjóðleg risafyrirtæki. Fyrst opnaði Costco í maí og síðan mun H&M opna fyrstu af þremur búðum í þessum mánuði," segir Andrés Magnússon, framkvæmdastjóri Samtaka verslunar og þjónustu.

Hann segir ómögulegt að spá fyrir um áhrif verslanarisanna tveggja á Íslandi til framtíðar. „Það var eiginlega skrifað í skýin að áhrifin yrðu einhver til skemmri tíma en það er útilokað og ég held að enginn geti spáð því hver áhrifin verða þegar ár er liðið eða hálft ár," segir Andrés.