Nærri því 400 þúsund rohingjamúslimar hafa flúið

Flóttamannastofnun Sameinuðu þjóðanna áætlar að 389 þúsund Rohingjamúslimar hafi flúið frá Búrma síðan átök hófust í Rakhine-héraði þann 25. ágúst. Þar á meðal séu um 240 þúsund börn og fólkið þurfi nauðsynlega á aðstoð að halda.

Á vef stofnunarinnar segir að yfirvöld í Bangladess og hjálparsamtök eigi erfitt með að aðstoða þennan fjölda. Þörf sé á skýlum, matvælum og lyfjum og læknaaðstoð.

Sumir sem hafa flúið yfir landamærin sjá þorp sín brenna við sjóndeildarhringinn en herinn og vopnaðir hópar búddista hafa verið sakaðir um að brenna heimili Rohingjafólks.

Hundreds of thousands of Rohingya Muslims from Myanmar are fleeing towards Bangladesh. Here are five things about the Rohingya. pic.twitter.com/NVr5dDpXZi

— AFP news agency (@AFP) September 15, 2017

Rohingjafólkið hefur búið í Búrma um langt skeið og hefur verið lýst sem þeim minnihlutahópi í heiminum sem býr við mestar ofsóknir. Talið er að þeir séu um 1,1 milljón og búa langflestir þeirra í Rakhine héraði í vesturhluta Búrma en stjórnvöld þar hafa ekki viðurkennt þau sem borgara. Rohingjafólkið er íslamstrúar en meirihluti íbúa Búrma eru búddistar.

Yfirvöld Búrma hafa verið sökuð um þjóðernishreinsanir og að reyna að reka Rohingjafólkið frá landinu.

Þau hefur herinn verið sakaður um að koma fyrir jarðsprengjum við landamæri Búrma og Bangladess.

Azizul Hoque died shortly after this video was filmed. His body was torn apart by a landmine as he and his Rohingya family fled Myanmar pic.twitter.com/pmjtyZ5G72

— AFP news agency (@AFP) September 14, 2017

Átökin hófust þegar uppreisnarmenn sem tilheyra Rohingjafólkinu gerðu samræmdar árásir á lögreglustöðvar. Herinn hefur verið sakaður um harkaleg viðbrögð. Fólk sem hefur flúið til Bangladess segir að hermenn hafi skotið á þau og hefur framkvæmdastjóri Sameinuðu þjóðanna, Antonio Guterres, segir ofbeldið vera þjóðernishreinsanir.

Þá segjast samtökin Amnesty International búa yfir sönnunum um að um sé að ræða skipulagða herferð sem gengur út á að brenna þorp Rohingjafólks.

AP fréttaveitan hefur eftir yfirvöldum í Búrma að hundruð hafi dáið í aðgerðum hersins og þar af tilheyri flestir Rohingjafólkinu. Þar að auki segja yfirvöld að 176 af 471 þorpi Rohingjafólksins hafi verið yfirgefin.