Mæðgur sem glíma við eltihrelli upplifa úrræðaleysi

Ung kona, sem glímir við eltihrelli, og móðir hennar, segjast upplifa algjört úrræðaleysi í málinu. Þær segja erfitt að fá aðstoð lögreglu og vilja að maðurinn, sem glímir við geðræn vandamál, fái viðeigandi aðstoð.

Eva Riley, birti myndband á Facebook í gærkvöldi, þar sem hún segir frá áreiti íslensks karlmanns, undanfarin fjögur ár. Maðurinn, sem virðist eiga við geðræn vandamál að stríða, hefur ítrekað sett sig í samband við Evu á samskiptamiðlunum Snapchat og Facebook. Eva, sem hefur aldrei þekkt manninn, fékk fyrst skilaboð frá honum árið 2014.

„Þetta byrjaði mjög létt bara hvað segirðu og hvað ertu að gera. Svo fór þetta út í ástarjátningar og svo hótanir til mín og mömmu minnar,“ segir Eva og bætir við að stundum gangi maðurinn svo langt að hann hótar henni lífláti.

Hún útskýrir að hún hafi alltaf lokað á hann á samfélagsmiðlum en að hann búi til nýjan aðgang, undir öðrum nafni, og haldi áfram að áreita hana. Eva kærði hann til lögreglu á sínum tíma en þegar systir mannsins sagði henni að maðurinn væri kominn á geðdeild og fengi aðstoð dró hún kæruna til baka. Eftir að hann kom út af geðdeild hélt hann hins vegar áfram að áreita hana, alveg til dagsins í dag.

Eva segir að eftir það hafi hún farið í tvígang til lögreglu en að lögreglan geri lítið sem ekkert í málinu.

Hildur Kjartansdóttir móðir Evu segir að þær upplifi algjört úrræðaleysi. Þær viti, eftir samtal við fjölskyldu mannsins, að hann sé mjög veikur á geði. „Þetta er örugglega mjög erfið aðstaða fyrir fjölskylduna. Ég er ekki viss um að það sé hægt að gera mikið til að hjálpa þeim og þau eru örugglega að koma mikið að lokuðum dyrum,“ segir Hildur.

Þær mæðgur vilja að tekið verið almennilega á málum sem þessum. „Maður verður reiður að vita að það er verið að tala svona við dóttur manns og hræða hana og maður verður bara smeykur. Er hann að fara birtast inn á heimili manns?,“ segir Hildur.