Þeir Finnsi og Haffi eru af fáum, ef ekki bara þremur, atvinnumönnum Íslands í tölvuleikjaspilun. Blaðamaður Vísis hitti þá og Jón Pétur Rúnarsson, liðsstjóra, á dögunum og ræddi við þá um mótið.
Mótið sem um ræðir heitir Overwatch Contenders. Undanfarnar sex vikur hafa þeir Hafþór, Finnbjörn og félagar þeirra í 123 keppt við sjö önnur lið í Evrópu um farmiða til Los Angeles. Þar munu koma saman fjögur bestu lið Evrópu og fjögur bestu lið Bandaríkjanna.
Á laugardaginn munu 123 keppa í undanúrslitum Evrópudeildarinnar og vinni þeir þann leik munu þeir keppa til úrslita á sunnudeginum.
Liðsmenn 123 lentu þó í smá vandræðum fyrir mótið þar sem Denis „Tonic“ Rulyov frá Rússlandi, fékk ekki vegabréfsáritun til Bandaríkjanna og þurftu þeir að fá aukamann til liðs við sig fyrir mótið.
Stærsta deildin í dag
Overwatch Contenders er stærsta Overwatchdeildin í dag, en unnið er að því að mynda enn stærri tólf liða deild á heimsvísu sem mun heita Overwatch League. Fyrirtækið Activision Blizzard, sem á Overwatch og umræddar deildir, borgar flugið út fyrir strákana sem og gistingu fyrir þá á fimm stjörnu hóteli.
Sjá einnig: Telja að Overwatch geti orðið stærri en enska úrvalsdeildin
Mikið verður lagt í leikina sem spilaðir verða. Fyrir alla leiki munu fjórir greinendur fara fyrir styrkleika og veikleika liðanna og spá fyrir um úrslitin. Þá er skipt yfir til lýsenda sem fylgjast með, segja áhorfendum hvað sé um að vera og greina stöðuna. Allt er þetta gert af mikilli fagmennsku samkvæmt strákunum.
Strákarnir segjast stefna á það að vinna mótið og að gera Íslendinga stolta.
Hér má sjá síðustu viðureign 123 á mótinu gegn liðinu GamersOrigin. Viðureignin var háð þann 25. september.
„Hafþór á marga vini en fleiri óvini held ég,“ segir Jón.
Hafþór spilaði leikinn Team Fortress mikið á sínum yngri árum, ef svo má að orði komast, og varð meira að segja heimsmeistari í þeim leik. Þar að auki hefur hann einnig spilað CS-Go. Finnbjörn spilaði CS-Go og aðra leiki en þó einungis sér til dægradvalar.
Spila um sæti í stórum liðum
Þeir Finnbjörn og Hafþór taka nú þátt í úrtökum fyrir Overwatch-lið í Philadelphia í Bandaríkjunum og munu mögulega einnig taka þátt í úrtökum fyrir lið í Boston. Mótið um helgina er mjög stórt tækifæri fyrir strákana til að komast áfram í þeirri íþrótt sem Overwatch er.
Þó þeir séu vinir þurfa þeir Hafii og Finnsi að keppast sín á milli um sæti í liðunum tveimur. Einungis tólf sæti eru í hvoru liði. Sex keppendur og sex varamenn.
Fyrirtækið Tölvutek stendur við bakið á strákunum og styrkir 123 fyrir mótið. Jón segir gott að vera í samstarfi við fyrirtækið og það sé gott hve opnir þeir séu fyrir að styðja við e-sports. Þá segir Jón að fyrirtækið sé eitt af fáum hér á landi sem styðji e-sports.
Sýnt verður frá mótinu á Twitch og verður hægt að horfa á það hér. Mótið byrjar klukkan 21:00 að íslenskum tíma og viðureign 123 hefst klukkan 22:00.
