Formannaáskorun Vísis: Tíu ára og áttaði sig á að fátækt væri til á Akureyri

Logi Einarsson, formaður Samfylkingarinnar, var tíu ára þegar hann áttaði sig á því að fátækt fólk væri til á Akureyri. Mystic River er uppáhalds bíómyndin hans en Logi heldur einnig upp á Grease og Saturday Night Fever.

Ef hann ætti að ráða einhvern til að leika sig myndi hann velja Dóra DNA.

Þetta er brot af því sem kemur fram í svörum Loga við Formannaáskorun Vísis.

Vísir leggur mikið upp úr því að umfjöllunin um Alþingiskosningarnar sé ítarleg og úr öllum áttum, líka skemmtileg. Því lögðum við fyrir alla formenn skemmtilegan spurningalista með spurningum af öllu tagi, sumar erfiðari en aðrar en allar í persónulegri kantinum. Svör fleiri formannanna hafa verið birt á undanförnum dögum og nú er komið að Loga Einarssyni, formanni Samfylkingarinnar.

Hver er fallegasti staðurinn á Íslandi?

Það hefur alltaf orkað sterkt á mig að standa fyrir opnu hafi og upplifa krafta þess. Ég nefni því Langanes og Reykjanes. Akureyri fóstraði mig og umbar, þrátt fyrir að ég hafi kannski ekki alltaf verið henni auðveldur. Mér þykir því alltaf vænst um hana.

Varstu sumar í sveit?

Nei, ég var upptekin við það að æfa fótbolta og leika mér við krakkana í hverfinu.

Hvaða mat ert þú best/ur í að elda?

Einfaldan heimilismat; fisk í raspi og gott lambakjöt. Það sést líka kannski svolítið utan á mér.

Hvernig bíl ekur þú og hefur þú gefið honum nafn?

Ég held hann sé af gerðinni Nissan Qashqai. Ég er lítill áhugamaður um bíla og hef því ekki hirt um að láta skíra hann. Reyndar er hann orðin 12 ára gamall og ferming stæði fyrir dyrum, ef ég vildi persónugera hann.

Hver er draumabíllinn?

Volvo að sjálfsögðu. Sósíal demókratískt tækniundur sem setur öryggið á oddinn. Hann þyrfti þó helst að vera drifin áfram af rafmagni.

Besti hrekkurinn sem þú hefur gert?

Þeir eru eflaust margir en yfirleitt svo sauðmeinlausir að það tekur því varla að nefna þá.

Besti hrekkurinn sem þú hefur lent í?

Stundum finnst mér lífið einn allsherjar hrekkur. Fullt af óvæntum aðstæðum og áskorunum. En ef maður tekur þeim af æðruleysi, kemur oftast eitthvað gott út úr því.

Uppáhalds tónlistarmaður?

Bob Dylan, Lou Reed og Bubbi Morthens.

Hefur þú komist í kast við lögin?

Ég hef nokkrum sinnum fengið hraðasektir.

Uppáhalds föstudagskvöldsdrykkur?

Það fer svolítið eftir tilefni og félagsskap. Best finnst mér að fá mér rauðvínsglas í eldhúsinu með konunni minni. Það er þó auðvitað ekki síður hún en rauðvínið sem veitir mér ánægjuna.

Uppáhalds bókin?

Því er auðsvarað. Heimsljós og Sjálfstætt fólk eftir Halldór Laxnes.

Uppáhalds bíómynd?

Dulá eða Mystic River, með Sean Penn, Tim Robbins og Kevin Bacon. Leikstýrð af Clint Eastwood.

Uppáhalds „guilty pleasure“ bíómynd?

Grease og Saturday night fever.

Hvað er uppáhalds pepp-lagið þitt?

Vicious með Lou Reed.

Hefur þú farið í Costco?

Já

Hefur þú farið í H&M á Íslandi?

Ekki enn þá en hún er mín kirkja á ferðalögum erlendis.

Hefur þú migið í saltan sjó?

Já ég var háseti á Sólborgu SU 202 frá Fáskrúðsfirði.

Þegar þú ferð í fríið, sólarströnd eða menning?

Helst bæði.

Uppáhalds þynnkumatur?

Í seinni tíð reyni ég að forðast að verða of timbraður. Í gamla daga var það slímugur hamborgari, nú vel ég að drekka mikið af vatni.

Ananas á pizzu?

Ég vel Jesús pizzu að hætti Ingu mágkonu: Sardínur í olíu, kartöflur, kapers og laukur.

Hvaða leikari væri fengin til að leika þig í bíómynd?

Ég myndi panta Dóra DNA.

Hvaða hreyfing er í uppáhaldi hjá þér?

Allar sem starfa með réttlæti, jöfnuð, mannúð og mannréttindi að leiðarljósi. Ég hef valið að starfa í Samfylkingunni.

Trúir þú á líf eftir dauðan?

Nei, eins gaman og mér þykir að lifa lífinu lifandi, finnst mér það notaleg tilhugsun að leggjast til svefns gamall maður til eilífðarhvíldar.

Hefur þú átt gæludýr?

Ég á alltaf ketti.

Með hvaða liði heldur þú (íslensku)?

Þór/KA.

Sterkasta minning úr æsku?

Þegar ég kom heim tilskólafélaga míns eftir fótboltaæfingu þegar ég var 10 ára og það var ekki til matur í ísskápnum og ég áttaði mig á að það var raunverulega til fátækt fólk á Akureyri.

Hvað er það skrítnasta sem þú hefur gert?

Mér leið satt að segja undarlega þegar ég áttaði mig óvænt á því að ég væri orðinn formaður Samfylkingarinnar.