Formannaáskorun Vísis: Ofnæmisgemlingur sem fékk oft nafnlaus sms og vill ekki eiga bíl

Katrín Jakobsdóttir, formaður Vinstrihreyfingarinnar - grænt framboð, drakk eitt sinn vodka með morgunmatnum í Rússlandi og segir það mjög skrítið. Hún heldur mikið upp á Stjörnustríðsmyndirnar og er sannfærð um að Eddie Murphy myndi leika hana í kvikmynd. 

Þetta er brot af því sem kemur fram í svörum Katrínar við Formannaáskorun Vísis.

Vísir leggur mikið upp úr því að umfjöllunin um Alþingiskosningarnar sé ítarleg og úr öllum áttum, líka skemmtileg. Því lögðum við fyrir alla formenn skemmtilegan spurningalista með spurningum af öllu tagi, sumar erfiðari en aðrar en allar í persónulegri kantinum. Svör annarra formannanna verða svo birt á næstu dögum en nú er komið að Katrínu Jakobsdóttur, formanni Vinstri grænna.

Hver er fallegasti staðurinn á Íslandi?

Þessari spurningu er ekki hægt að svara. Kannski Dynjandi við Arnarfjörð, kannski fjaran við Djúpavog, kannski Reykjanestá í ólgandi brimi, kannski Ægisíðan á júníkvöldi. Það eru svo margir yndislegir staðir á Íslandi.

Tókstu sumar í sveit?

Ofnæmisgemlingurinn ég var aldrei send í sveit sem barn. En ég heimsótti ýmsar sveitir í sumar með fjölskyldunni.

Hvaða mat ert þú best/ur í að elda?

Mesta hrósið fæ ég fyrir pottrétti sem ég er allan daginn að elda. Og mesta uppáhaldið mitt er marokkóskur pottréttur sem er reyndar mjög góður…

Hvernig bíl ekur þú og hefur þú gefið honum nafn?

Ég ek á Skoda. Hann heitir ekki neitt. Hann heitir … Skoda.

Hver er draumabíllinn?

Draumurinn er að eiga engan bíl.

Besti hrekkurinn sem þú hefur gert?

Ég er mjög léleg í hrekkjum því ég fer alltaf að hlæja áður en að gríninu kemur. Svo á ég svo tortryggna vini að það er ekki hægt að hrekkja þá.

Besti hrekkurinn sem þú hefur lent í?

Allir sem mig þekkja vita að ég á það til að senda röngu fólki röng skilaboð. Þau atvik eru því miður of vandræðaleg til að nefna þau en vinir mínir áttu það til þegar hægt var að senda nafnlaus sms af vefsíðum símafélaganna að senda mér mjög skrýtin sms sem ollu oft miklum misskilningi. Svo var tekið fyrir þetta sem betur fer fyrir trúgjarnt fólk eins og mig.

Uppáhalds tónlistarmaður?

Þetta er ekki hægt. Ég hlusta á tónlist á hverjum degi og margir tónlistarmenn eru í guða tölu. Ég ætla bara að nefna Víking Heiðar því hann er frábær en þeir eru margir uppáhalds.

Hefur þú komist í kast við lögin?

Já fyrir hraðakstur og að tala í síma undir stýri.

Uppáhalds föstudagskvöldsdrykkur?

Það er nú það. Ég er ekki stórnotandi á áfengi en eitt freyðivínsglas er nú alltaf stemmning.

Uppáhalds bókin?

Nafn rósarinnar eftir Umberto Eco og Kristnihald undir jökli eftir Laxness.

Uppáhalds bíómynd?

Stjörnustríðsserían er alltaf uppáhalds. Og svo held ég upp á allt eftir Alfred Hitchcock og Luis Bunuel en á erfitt með að nefna eitthvað eitt umfram annað.

Uppáhalds „guilty pleasure“ bíómynd?

Ég ætla að nefna Naked gun. Ég er sú eina á heimilinu sem er aðdáandi Leslie Nielsen. Það er sko „guilty pleasure“.

Hvað er uppáhalds pepp-lagið þitt?

Segjum bara eitthvað með Swedish House Mafia – eins og Don´t you worry child.

Hefur þú farið í Costco?

Nei.

Hefur þú farið í H&M á Íslandi?

Nei (greinilega ekki nógu öflug í verslunarferðum).

Hefur þú migið í saltan sjó?

Nei það myndi örugglega enda með stórslysi.

Þegar þú ferð í fríið, sólarströnd eða menning?

Menning. Hef aldrei farið á sólarströnd eins og sést á litaraftinu.

Uppáhalds þynnkumatur?

Ég drekk lítið og verð því sjaldan þunn en ætli það sé ekki kóka kóla og grilluð samloka með skinku og osti.

Ananas á pizzu?

Já alveg stundum.

Hvaða leikari væri fengin til að leika þig í bíómynd?

Eddy Murphy, ekki nokkur spurning.

Hvaða hreyfing er í uppáhaldi hjá þér?

Að hlaupa.

Trúir þú á líf eftir dauðann?

Nei en ég trúi á þetta líf.

Hefur þú átt gæludýr?

Nei.

Með hvaða liði heldur þú (íslensku)?

KR auðvitað.

Sterkasta minning úr æsku?

Þegar ég datt úr bát í Öxará – gleymi því aldrei. Hef lent í óteljandi slíkum vandræðalegum atvikum síðan.

Hvað er það skrítnasta sem þú hefur gert?

Drekka vodka með morgunmatnum í Rússlandi.